Riba proposishon di su partido a nombra e aktual lider di frakshon di MPB Elvis Tjin Asjoe komo diputado pa un periodo interino. E ta tuma enkargo di e kartera di diputado Nina den Heyer kende entrante fin di luna di novèmber a tuma despedida. Debí na e tempu kòrtiku ku ta resta te na elekshon di Konseho Insular (15 di mart), na interes di progreso a skohe pa un kandidato ku eksperensia ku por kuminsá traha mesora sin ku un periodo di introdukshon den e trabou ta nesesario.
Spesialmente den kaso di e areanan di Asuntunan Sosial i Bienestar, Kuido di Salubridat Públiko i Bibienda Popular tin kestion di desaroyonan urgente ku ta eksigí atenshon kompleto. Tin por ehèmpel kòmbersashon ku ministerio tokante entre otro organisashon di e investigashon pa yega na stipulashon di e mínimo sosial, eksistensia di BonLab i realisashon di un programa di desaroyo espasial i bibienda. ‘Esakinan ta tópikonan importante pa nos komunidat. Nos a buska un persona ku por bula riba e trein den kareda’, segun direktiva di MPB.
Funshon gubernamental
Elvis Tjin Asjoe kende na aña 1966 a nase na Antriol, den e periodo di 2007 – 2010 tabata minister di Desaroyo Ekonómiko i labor den e gabinetenan De Jongh-Elhage I i II. Na aña 2013 el a funda MPB (Movementu di Pueblo Boneriano). Durante e promé elekshon ku MPB a partisipá na dje na aña 2015, mesora e partido a resultá esun di mas grandi. Pa motibu ku e otro partidonan a tene MPB pafó di Kolegio Ehekutivo, Elvis Tjin Asjoe a bira lider di frakshon den Konseho Insular.
Anteriormente tres biaha e lider di MPB tabata diputado. Na aña 2009 i 2010 pa un periodo kòrtiku. Na aña 2019 ora ku e partido un biaha mas a gana elekshon, Elvis Tjin Asjoe a bira diputado di Finansa, Desaroyo Ekonómiko i Turismo. Na luna di novèmber 2020 pa motibu di sirkunstansianan privá el a dal un paso atras i a bolbe drenta Konseho Insular.
Importante
Te na formashon di un koalishon nobo despues di elekshon binidero Elvis Tjin Asjoe komo diputado ta enkargá ku entre otro asuntunan sosial i bienestar, kuido di salubridat públiko, asuntunan laboral, kultura, enseñansa i bibienda popular. ‘Riba algun di e áreanan akí aktualmente hopi kos ta tuma lugá na Den Haag. No ku riba término kòrtiku ta bai tuma desishonnan grandi, pero ta importante sí pa nos keda riba e kosnan akí, pa evitá ku den kurso di otro aña nos ta haña nos konfrontá ku eskohonan ku nos no a partisipá den kòmbersashon tokante di nan’, segun Elvis Tjin Asjoe.
