Den un ambiente ameno,
Den cuadro di Dia Internacional di Hende Muhe, Presidente di Comision di Hende Muhe señora Darlaine Guedez-Erasmus a organisa na Cede di MEP un encuentro ameno y sumamente balioso. E tema di workshop pe anochi aki ta Presupuesto Familiar cu a ser duna pa sra. Paloma Osorio.
Segun sra Guedez-Erasmus a scoge e tema aki mirando cu apesar cu hende muhe ta ocupa henter siman cu diferente actividad sea laboral of familiar, maneho financiero di famia ta keda un aspecto importante. Durante e periodo di covid tabata tin hopi reto den e parti financiero y pa e motibo aki a organisa e workshop aki pa asina cu ayudo di profesionalnan por haya un miho bista con pa maneha esaki miho den futuro.
Den un circulo chikito, cu candidatonan femenino di MEP, esposa di candidatonan masculino y Forsa Femenino Grace, a celebra e dia special aki y a gosa di entretenimiento cu Meneer Jaime a bin dedica na e sernan femenino presente.
Pa Partido MEP, e fecha aki ta uno hopi special ya cu desde cu e partido a wordo funda pa señor Betico Croes, den feliz memoria, sigui pa lider honorario señor Nelson Oduber, semper participacion di hende muhe tabata esencial. Partido MEP ta un partido politico cu hopi aña y trayectoria y e Partido cu mas tanto hende muhe den posicion clave cu despues a forma parti di Parlamento, tabata Presidente di Parlamento, Minister y awe Minister President.
Riba e anochi aki nos damanan a celebra tur nan exitonan den bida y alabes a siña cosnan nobo cu den bida ta importante.
“Mi ta gradici Darlaine pa organisa e evento aki y tur esnan cu a acudi na e anochi agradabel aki unda nos por celebra e hecho cu nos tur ta hende muhe, nos tur a logra hopi y nos tin hopi mas pa logra. Tambe mi ta duna un elogio na Forsa Femenino Grace cu tabata e motor semper tras di nos tur como candidatonan.” Lider di MEP y Prome Minister Evelyn Wever-Croes a expresa.
