ORANJESTAD,Aruba
Cu hopi tristesa mi a tuma nota di fayecimento di un gran Arubiano, un baluarte integro, honesto y leal, un fiel luchado pa e causa Arubano, esta awe den feliz memoria Celestino “Miro” Dabian.
Miro Dabian a nace dia 6 di april 1944 y ya desde hoben caba el a interesa pa drenta politica y traha na bienestar y felicidad di e pueblo Arubiano. Ta p’esey na momento cu Gilberto François “Betico” Croes a funda su propio partido Movimiento Electoral di Pueblo (MEP) dia 9 di februari 1971, Miro Dabian tambe a forma parti di e partido aki como co-fundador. Asina el a aparece como candidato nr. 14 riba e prome lista di MEP cu a bay eleccion dia 28 di mei 1971. Sin duda cu Betico Croes a mira den Miro Dabian un hoben dinamico, inteligente, humano y un homber cu hopi curashi, un persona ideal pa por ta candidato riba lista di su partido.
Pa algun aña Miro Dabian a traha na e Departamento di Asuntonan General y Huridico na Aruba. Pero na aña 1973 Miro Dabian a haya un encargo importante na Antillenhuis na Den Haag, esta tempo cu Aruba tabata forma parti ainda di e constelacion Antiano y asina pues Miro y su famia a emigra pa Hulanda pa asumi e encargo aki.
Despues cu na 1982 a ser funda Arubahuis na Den Haag, cu tur honor Miro Dabian a asumi e encargo como e prome director di Arubahuis. Aki Miro a desplega un excelente trabao y locual a resalta tabata su curason grandi asistiendo y yudando tur studiante y otro Arubianonan residencia na Hulanda. Tambe Miro Dabian tabata un di e motornan hunto cu ing. Roland Lacle dfm cu na 1982 a organisa e prome Arubadag den Congres Gebouw na Den Haag, Hulanda.
Alabes Miro Dabian tabata e persona principal cu tabata haci tur e contactonan y lobbymento pa Betico Croes na Hulanda. Schouder cu schouder Miro Dabian a lucha hunto cu su gran lider pa logra e Status Aparte di Aruba.
Mescos cu su temporada na Antillenhuis y despues na Arubahuis tambe Miro tabata haci su trabaonan cu hopi placer guiando nos studiantenan Arubiano y tambe e Arubianonan cu a bay biba na Hulanda. Cu hopi aprecio y gradicimento nan tur y tambe nan mayornan na Aruba a mira den Miro Dabian un berdadero tata pa nan yiunan leu for di nan hogar.
Despues di a biba y traha pa hopi aña na Hulanda, Miro Dabian a regresa su isla natal y a bay traha como director di e compania di seguro Boogaard. Aki tambe el a laga su marcanan positivo atras y tur e empleadonan di e compania aki te ainda tin palabranan di aprecio so pa tur e trabaonan cu Miro Dabian a desplega como director.
E stimacion pa e partido cu el a yuda funda na 1971 nunca a desvanece durante henter Miro su trayectorio di bida. Como tal Miro semper tabata un piesa clave na momento cu lider di partido tin cu traha e lista di candidatonan pa eleccion. Miro Dabian no solamente tabata consehero pero su persona mes tabata busca y propone na lider di partido e potencial candidatonan y mayoria di biaha cu hopi exito electoral.
Sin duda cu e cualidadnan mas principal durante Miro Dabian su bida ta su integridad, honestidad, lealtad, balornan cu ta inherente na e gran Arubiano aki.
Lamentablemente Miro Dabian no a biba pa mira su partido MEP cu el a yuda funda na 1971 celebra su 50 aniversario dia 9 di februari 2021.
“Miro, mi ta gradici bo pa tur loke bo a haci pa nos pais y pa partido MEP y ta spera cu bo lo tin un bunita luga den Reino di Señor. Na bo señora Odette, yiunan Caresse, Danilo y Roque, bo rumannan y henter familia, danki pa permiti pa boso kerido Miro por a haci tur su trabaonan na bienestar di nos comunidad y den forma asina ehemplar”, Lider di MEP, Evelyn Wever-Croes a expresa.
Cu Miro sosega na paz.
