Lider di partido MAS Marisol Lopez Tromp tambe tabatatin reunion cu gobernador den oranan di atardi. Despues cu a caba di combersa cu gobernador lider di MAS ta duna di conoce cu e ta sumamente contento, satisfecho y orguyoso con e eleccion a bay pa partido MAS unda cu e partido a ricibi 2 asiento y ta hopi agradecido na cada un di e ciudadanonan cu a deposita su confiansa den partido MAS pa cada candidato, pero tambe hopi contento pa e cantidad di votonan cu su persona como lider di MAS a ricibi.
Segun lider di MAS pa loke ta e resultado di eleccion e cantidad di voto ta un señal cu esunnan cu a vota pa nos kier wak un cambio. Segun e lider esakinan ta votonan no tradicional cu a bay pa e partidonan cu awor aki a crece. Den e eleccion ultimo 5 partido a haya asiento y den e caso aki partidonan tradicional cada un a bay un poco atras, segun lider di MAS Marisol Lopez Tromp.
Sinembargo e partidonan chikito a bay dilanti y den e caso di partido MAS sigur a bay dilanti grandemente unda cu pueblo a duna un señal di dos asiento den un tempo asina cortico cu ta algo insolito. Pa prepara un partido no ta facil unda cu dia 22 di April a cuminsa cu e preparacionnan unda cu den dos siman mester a prepara e candidatonan cu ta concerni di un lista di 7 candidato unda cu e enfoke tabata cu no ta bay pa cantidad pero e calidad di persona cu ta pone riba un lista y consecuentemente lo no campaña cu material mirando cu Aruba ta den un pandemia.
Lider di partido di MAS ta considera cu na e momentonan aki Aruba ta den un situacion caminda cu e tempo cu ta bin nos dilanti tin decisionnan cu lo mester keda tuma cu ta mara na e landspakket, esey ta loke cu tin y aparte di e programanan di e partido esey ta conta pa cual constelacion cu sinta ta bay haya nan mes cu esaki.
Parlamento di Aruba ta bay haya su mes ta tuma decisionnan tambe cu tin di haber cu e landspakket cu cambionan di ley ect ect. Partido MAS a pone den su programa unda cu a tene cuenta cu e realidad aki cu a wordo firma 13 di november 2020 cu minister presidente a firma y mara Aruba na man cu pia na e acuerdo aki y di cual MAS a pone den programa tambe, kico ta e proyectonan y plan nan cu MAS ta wak realisabel teniendo cuenta di loke pueblo a vota pe dunando MAS dos asiento.
Segun lider di MAS Marisol Lopez Tromp partido MAS ta enfoca pa combati corupcion debi cu e ta presente den e aparato publico y esey ta un di nos puntonan principal mescos cu tambe bienestar di nos hendenan educacion, salud , medio ambiente y respet pa nos leynan. Lider di MAS ta kere cu ta un momento pa para un rato keto y wak e tres partidonan cu a bay dilanti den voto por nifica den e formacion aki.
Lider di Mas ta di opinion mirando e añanan di experiencia cu su persona tin den gobernacion e situacion actual ta un situacion diferente unabes cu e landspakket ta firma y no ta manera anteriormente cu tin presupuesto cu por disponi di dje y tuma decisionnan y haci diferente proyecto manera antes tabata e caso.
Tin un situacion na e momentonan aki cu Aruba no tin placa y e fiñasa cu nos tin ta condiciona na condicionnan cu ta hinca den landspakket. Lider di MAS ta kere cu tur partido mester realisa e situacion aki y consecuentemente lider di MAS ta kere cu e decisionnan cu tin cu wordo tuma si di berdad kier hacie cu un seriedad y cu e ta bay sosode di berdad pa haci reforma nan pa bin cu inversionnan pa hiba nos pais dilanti.
Mester tin un base mas amplio y esey ta nifica cu e tres partidonan cu a bay dilanti ta di opinion cu ta na su luga pa hiba un combersacion, pero no solamente un combersacion, pero forma tambe un bloke strategico cual ta significa cu tur esunnan cu a deposita nan confiansa, nan voto den cada un di e partidonan, ta esunnan cu kier wak un cambio cu ta esunnan cu no a vota pa partido tradicional y pa honra esaki y tene cuenta cu e votonan aki cu ta e 5 asientonan cu tin.
Ta hopi importante pa conhuntamente wak con ta sigui y cu por forma un bloke strategico pa cu e formacion cu ta bin nos dilanti. Lider di MAS a sinta 10 aña den parlamento y e ta un trabao hopi importante y mirando e trayecto nos dilanti ta na su luga pa considera un bloke strategico pa asina tur esunnan cu a pone nan confiansa den e partidonan chikito pa nan tambe tin un voz real pa un cambio den cualkier constelacion cu por tin. Esaki ta e opinion di lider di partido MAS mirando e resultado di eleccion cu a tuma luga.
Lider di MAS Marisol Lopez Tromp : Ta na su luga pa e tres partidonan hiba un combersacion, pero forma un bloke strategico tambe
