ORANJESTAD, Aruba
Un biaha mas siman pasa, gobierno a manda su fraccionnan den Parlamento, bay lanta un ‘smoke screen’ pa asina prepara pueblo pa otro serie di medida cu ta na caminda.
Lider di fraccion di AVP den Parlamento, sr Marlon Sneek a mustra cu e reunion diahuebs siman pasa yama, ta simplemente otro intento di gobierno cu su muchanan manda den parlamento, pa trata di bisa pueblo cu mas medida ta na caminda y cu esaki ta culpa di e gobierno anterior.
Ta increibel con tres fraccion cu ta sostene gabinete Wever Croes, ta haci un peticion recientemente pa trata un rapport di Rekenkamer cu tin dos aña den lachi na parlamento pero cu awor kier usa pa kita atencion di pueblo riba medidanan pisa cu ta na caminda.
“Nos a haya un invitacion na careda pa un reunion pa trata un rapport cu tin dos aña drumi den Parlamento mientras cu tin otro reunionnan cu a wordo solicita cu tin caracter mucho mas urgente, pero cu no a wordo yama ainda.
Tur hende sa cu CITGO ta bay cera y trahadonan ta bay perde nan trabou y fraccion di AVP a pidi un reunion publico pa debati riba e situacion aki pero reunion no a wordo yama.
Tin problema serio den enseñansa y AVP a dirigi shete peticion pa un reunion publico pero pa gobierno esaki no ta importante y no ta wordo yama.
Fraccion di AVP ta pidi aclaracion riba e hecho di con presupuesto no a yega Parlamento ainda pero ta mustra cu esey no ta importante y no ta yama e minister bin duna cuenta.
Medidanan cu ta na caminda manera cu a sali publica den e rapport di CAFT tampoco ta importante pa gobierno y tampoco ta yama un reunion riba esakinan.
Pero si ta importante pa yama un reunion pa asina crea un panico bou di comunidad, crea e impresion cu AVP lo a laga debe atras cu pueblo tin cu paga y cu ta un desaster tabatin.
Sinembargo e rapport cu a worrdo trata siman pasa no ta nada mas c’un rapport pa bisa nos, cosnan cu no por cambia den un proceso cu pa añanan largo nos a usa den e pais aki.
Tur hende ta corda cu gobierno a sinta na november y a bin c’un presupuesto supletorio y a participa cu nan ta bay renoba bestuurskantoor.
Unda e projectdossier ey ta? Unda e rapport di impacto financiero di e proyecto ey ta? Simplemente e not a existi pa motibo cu e ta bin for di algemene middelen y loke tin eynan ta un rapport di DOW, un calculacion di DOW cuanto e proyecto aki ta bay costa y gobierno ta dicidi si e ta bay ehecuta esaki.
Proyectonan cu a wordo describi den e dossier siman ta fondonan cu ta sali for di FDA y pa haci un proyecto via di FDA, bo mester tin un dossier caminda bo ta presenta kico bo ta bay haci pa por haya e placa pa asina realisa e proyecto aki.
Ora kier papia di proyectonan manera Watty Vos Boulevard, manera hospital, manera Green Corridor, ta proyectonan financia internacionalmente, pa banconan internacional y si bo no tin un dossier, e proyectonan aki no ta wordo financia.
Caminda tin bagamunderia manera den Serlimar, cu bisiña ta haya proyecto sin cu tabattin ningun destaho, sin cu tabatin nada y eynan ta caminda mester bay cuminsa tira bista.
Manera nos a bisa den e reunion menciona di siman pasa, esaki ta un “smokescreen” pa haya unm excusa pa hustifica otro pakete grandi di medida cu ta na caminda y pueblo lo bolbe sufri un inhusticia grandi na man di gabinete Wever Croes,” lider di fraccion Marlon Sneek a declara.
