ORANJESTAD, Aruba
Pueblo mester ta alerto, pueblo tin cu cuminsa para duro, ya cu despues di a scucha Minister di Finansa duna declaracion na prensa, pueblo tin cu spera un serie di medida si piedad na caminda.
Lider di fraccion AVP, sr Marlon Sneek a mustra cu tin un dicho na Papiamento cu ta bisa cu ‘traha dam pa warda awa,” wel loke Minister Xiomara Ruiz Maduro a splica dialuna ultimo, ta un mensahe cla y raspa cu medidanan ta na caminda.
Segun sr Sneek, e mandatario a bay asina leu na confirma na pueblo cu e tempo a yega pa lucha pa tene cachete riba awa, te ora cu e situacion drecha pero sin menciona e fecha cu e lo drecha esaki pa pueblo haya alivio.
“Esaki ta mesun Minister cu como politico durante di campaña, a bay cas pa cas pa sigura tur hende, cu MEP tin solucion pa e situacion financiero di e pais, anto solucion sin cu mester tuma medida.
Wel apenas algun luna na mando y Xiomara como Minsiter di Finansa, a redoble BBO y e bin cu cantidad di otro medida mas cu practicamente a choca pueblo y comercio formalmente, creando un inflacion cu poco bes nos a yega di conoce.
Sinembargo ora cu nos a scucha Minister aki bisa dialuna ultimo, cu mester sigui lucha, cu mester sigui wanta duro pa su persona y su gobierno drecha e situacion financiero, e ta pretende di bolbe bay usa mesun excusa laf cu tur e cos aki a bin dor di proyectonan di PPP caminda gobierno di AVP a aumenta e debe nacional.
Hasta Minister Ruiz Maduro a dicidi di bay bek den pasado y bolbe tira culpa riba proyectonan cu AVP a bin cu nan pa un miho desaroyo di e pais, insinuando cu ta e proyectoanan aki tin gobierno den un situacion dificil y cu mester tuma medida.
Pero aki un biaha mas Minister Ruiz Maduro ta trata di hunga pa kens, trata di kere cu pueblo ta lubida kico su gobierno a bin ta haciendo, caminda entre otro a sigura cu lo no tuma ningun medida.
Awor na 2018 ora cu a introduci e serie di medidanan, Gabinete Waever Croes cu sosten di fraccionnan di MEP-POR-RED den parlamento, a introduci e asina yama BAVP, cu tabata un medida cu cual mester a bay paga e proyectonan di PPP.
Fuera di e medida ey, gabinete Wever Croes a introduci otro impuesto cu e nomber di BAZV cu mester a yuda AZV pa cubri e gastonan halto di cuido medico pero na mes momento tambe Ministrer Xiomara a aumenta e accijns riba diferente articulo y riba gasolin.
El a impone un aumento di grondbelasting cu a perhudica cantidad di hende y como parti di e crisisheffing, a introduci e ora e BAVP cu mester a cubri e proyectonan di PPP di gobierno di AVP.
Tur e impuestonan aki a produci e suma di 270 miyon florin, placa cu gobierno a ranca for di cartera di pueblo y ora cu elimina e sugar tax cu no a drenta na vigor, ta keda alrededor di 250 miyon florin adicional cu gabinete Wever Croes a coy for di pueblo.
Ta hopi curashi Minister Ruiz Maduro mester tin pa bin bisa awor cu proyectonman di PPP lo bay costa e aña aki alrededor di 70 miyon cu mester wordo paga, incluso Watty Vos Boulevard pero ora cu kita e 70 miyon aki for di e suma di 250 miyon extra cu a ranca for di pueblo, a keda gobierno 180 miyon florin adicional cu el a haya.
Loke Xiomara no kier compronde ta e hecho cu CFT a mustra na varios ocasion cu gastonan di personal a aumenta cu mas cu 100 miyon florin, pues placa cu gabinete Wever Croes a ranca fir di cartera di pueblo, a bay pa paga huurmento di edifico di sponsornan, paga salario di sostenedonan di partido y tur cos ta indica cu ainda esaki no ta suficiente y cu gobierno di Minister di Finansa lo bay castiga pueblo un biaha mas cu un serie di medidanan,” lider di fraccion di AVP, sr Marlon Sneek a declara.
