ORANJESTAD,Aruba
Lider di Fraccion di POR, Dellanire Maduro, diabierna ultimo atraves di Presidente di Parlamento a haci un peticion pa Minister Dangui Oduber presenta na Parlamento pa un vragenuur riba e topico di Coronavirus y con Pais Aruba ta atendiendo cu e menasa mundial aki.
Den su carta e parlamentario ta indica cu teniendo na cuenta cu World Health Organisation a declara un emergencia di salud mundial den cuadro di e Coronavirus y cu Aruba ta ricibi miles di turista diariamente,ta importante pa por haya e informacion y pasonan cu a/ta/lo tuma pa preveni of atende cu un situacion di e magnitud aki.
E preguntanan cu Dellanire Maduro a manda pa e mandatario encarga cu Salud y Turismo ta e siguientenan: 1. Fuera di e tareanan di Rampen Bureau, cua ta e protocolnan cu nos tin pa nos cumpli cu International Health Regulations (IHR)? 2. Dokternan di cas ta envolvi den e protocol na momento cu un caso presenta? Nan sa e stap nan pa sigui? 3. Tin un investigacion haci riba con grandi e risico ta pa nos haya un caso? 4. Aeropuerto lo haci uzo di ‘termic screening’ of otro tipo di ‘screening’ na aeropuerto pa e area di yegada awo cu e ta un emergencia global? 5. Ta berdad cu Merca ta uzando Aruba como un di su puntonan di control pa e coronavirus, mas specifico e parti di US pre-clearance na aeropuerto di Aruba pa pasaheronan cu ta sali di Aruba pa Merca? 6. Lo haci ‘screening’ na puerto di crucero? 7. Momento un persona presenta intomanan sospechoso, kico e persona mester haci? E mester keda cas? Yama Directie Volksgezondheid DVG)? Of mester bay dokter di cas? 8. Kendenan ta conforma e team dedica y getrain pa antende cu e emergencia aki? a. Ki training specifico pa e caso di ‘outbreaks’ respiratorio e team aki tin? b. Di cuanto persona e team ta consisti? 9. E personal medico tin un sistema di triage, por ehempel HOH, IMSAN? a. Si e respuesta ta afirmativo, e ta consisti di personal getrain? 10. Lo haci enfasis via medionan di comunicacion cu na momento cu tin sintomanan sospechoso mester avisa dokter di cas (of DVG)? a. Si presenta esaki por ehempel anochi unda por meld etc? 11. Tur laboratorio na Aruba lo realisa e test of tin un laboratorio escogi pa realisa esaki? 12. Lo haci huisbezoek of lo pidi e persona pa bay e laboratorio personalmente? 13. Tin algun campaña activo actualmente cu ta educa nos comunidad con mester laba man, haci uzo di hand sanitizers, nister/tosa apropiadamente? 14. Tin splicacion duna na publico con pa haci uzo di un mask adecuadamente na e momentonan aki? 15. Ki momento lo educa tocante e “5 moments for hand hygiene”? 16. Cua ta e localisacion di cuarentena? 17. Cuanto cambernan di isolacion lo tin disponibel? 18. Cua ta e ‘waist management plan’ di e desechonan crea na e area di cuarentena? 19. Apart di e area di cuarentena, tin areanan planea caba pa wordo uza manera “sala di espera” pa casonan sospecho den caso cu mester warda prome cu wordo atendi? 20. Con sector turistico ta prepara pa un caso di coronavirus? 21. Den caso cu un turista na Aruba presenta e sintomanan con lo atende cune y su famia?
22. Con e organisacionnan turistico na Aruba, muy en especial Aruba Tourism Authority lo atende cu un situacion di presencia di Coronavirus na Aruba? 23. Tin un plan di contingencia traha caba pa un posible situacion asina? 24. A premira ki efectonan Aruba lo por tin den caso di presencia di Coronavirus na nos isla? a. Con lo atende cu e posibel caida di nos turismo? b. Con lo atende cu e posibel efectonan economico? c. Cuanto tempo ta calcula cu lo transcuri prome cu por bolbe na un situacion stabiel?
Cu e preguntanan aki e lider di fraccion di POR ta desea di trece mas tanto claridad y informacion pa henter comunidad riba con ta atendiendo cu e Coronavirus. Intencion ta pa tur hende por scucha cua ta e pasonan cu a tuma, e protocolnan cu lo sigui y mas cu tur pa sa cua ta e forma mas eficiente di preveni pa wordo contagia.
