Presidente di Parlamento mr. Edgard Vrolijk después di mas di un luna di tardansa pa yama e reunion cu fraccion di AVP a solicita, pa scucha sector di cuido na Aruba den un Openbare Bijeenkomst, a dicidi di yama e reunion den un comisión será di Parlamento. Líder di fraccion di AVP, mr. Mike Eman ta haya cu pueblo mester por scucha tur e preocupaciónnan cu sector medico tin pa cu e medidanan contempla dor di Gabinete Wever Croes den e paquete di seguro medico, AZV. Ta hopi tristo cu e parlamentarionan cu ta sostene Gabinete Wever-Croes hunto cu nan gobierno no ta tuma preocupacionnan di sector medico na serio y kier tene reunion riba medidanan cu lo azota mundo medico y pueblo tras di porta cera
Preocupacion den sector medico ta sigui, tanto bou e sector mes como bou comunidad di Aruba. Sindicato ABV hunto cu su miembronan a sali afo na hospital y Respaldo pa mustra e disgusto grandi cu ta reina pa loke ta e medidanan cu ta biniendo cu ta bay afecta cuido medico grandemente. Relaciona cu e medidanan henter sector medico na Aruba a manda un carta pa Parlamento unda ta vocifera e peocupacion aki y a pidi un reunion urgente pa discuti e medidanan cu ta na caminda. Fraccion di AVP di su banda mesora a pidi un reunion publico (Openbare Bijeenkomst) den Parlamento hunto cu esnan di sector medico pa discuti e situacion grave aki.
Eman ta splica riba esaki. “Nos ta comparti e preocupacion reinante den mundo medico. Ya for di 14 di februari un carta a yega Parlamento firma pa tur stakeholder relevante di e sector medico. Nan tur a expresa nan preocupacion y p’esey nos kier mas pronto posibel un reunion riba e tema grave aki.”
Lider di AVP mr. Eman ta bisa cu e medidanan ta na caminda. Nan a conclui esaki dor di e contestanan cu gobierno a duna Raad van Advies pa loke ta presupuesto. Ta bay bin un pakete grandi di medida, unda e pashent tin cu bay paga pa varios di su remedinan, paga un eigen bijdrage pa mira su dokter/specialista y tambe pa haci test na laboratorium. E lista di remedinan cu no ta bay wordo cubri mas pa AZV- den e asina yama positieve lijst – ta largisimo. Esaki ta bay ta un golpi duro pa henter Aruba, pero mas tanto pa esnan mas vulnerabel den nos comunidad. Eman a papia cu varios medico y nan ta bisa di no ta kere cu sra. E. Wever-Croes por exigi di nan pa keda sin trata un anciano cu ta yega nan oficina den un situacion cu ta rekeri cuido medico urgente. “Mediconan ta bisa cu esaki ta enpugna cu nan huramentacion, botica y laboratoiumnan ta mira cu e consecuencianan di e medidanan ta cu hopi hende lo no por paga pa nan remedi of haci testnan cu ta crucial pa nan salud”.
E sector di cuido a adverti den nan carta cu esaki ta bay conduci na un asina yama ‘Klassenzorg”, solamente esnan cu tin placa por paga pa nan cuido medico y e otronan lo mester sufri. Ta pa kita “klassenzorg” AZV a worde introduci, mr. Mike Eman ta bisa. Hustamente tabata e meta di AZV pa tur hende tin cuido igual. Eman: “Tur esaki ta bay cambia cu e medidanan cu ta bay wordo introduci dor di Wever-Croes y Dangui Oduber. Ta pa e motibo aki nos a manda un carta fecha 17 di februari pa Presidente di Parlamento pa e yama un reunion habri cu henter sector medico pa scucha di nan publicamente kico ta andando y pakico nan preocupacion. Un reunion cu ta wordo transmiti pa henter pueblo”.
Eman ta bisa cu pa nan sorpresa desagradabel Presidente di Parlamento sr. Vrolijk a yama un reunion cu un Bijzondere Commissie di Staten cu lo wordo teni tras portanan cera unda pueblo lo no tende kico ta pasando den mundo medico aki na Aruba. Un situacion sumamente peligroso y inaccepabel. Claro cu fraccion di AVP lo laga su voz di protesta resona riba e tema aki, mr. Mike Eman a enfatisa.
