Na inicio di tratamento di Presupuesto 2022 den Staten di Aruba fraccion di AVP pa medio di su lider Mike Eman a haci entrga di un Presupuesto Alternativa. Na 2008 tabata ultimo bes cu un Presupuesto Alternativa a keda entrega. E tempo ey tambe tabata dor di Eman mes den su prome salida como lider di oposicion.
Eman ta bisa cu fuera di e merito di e contenido di un Presupuesto Alternativa, e accion aki ta sigur un iniciativa inovador cu ta contribui na e madurez di Parlamento di Aruba. E ta lamenta reaccion fuera di control y bao nivel di tanto Prome Minister Evelyn Wever-Croes como di Xiomara Maduro di Finanzas pa ataca e presupuesto alternativa. E tabata den un contraste hopi grandi cu e iniciativa di nivel y contenido di presupuesto alternativa.
Eman ta splica cu oposicion a tuma su responsabilidad pa den forma fundamenta y substancia bin cu un alternativa den e presupuesto y kwantifica esaki saliendo di e forma di e custumber tradicional di djis pa definicacion vota contra e presupuesto entrega dor di gobierno. Den e contexto di custumber den Paralamento esaki ta un gesto madura y inovador. Eman ta bisa cu ta pesey mes cu e reaccion defensivo y exagera di tanto Wever-Croes como Maduro riba e novum rebiba y positivo den Parlamento di Aruba aki ta keda algo di rechasa.
De e presupuesto alternativa di fraccion di AVP ta bin cu 4 proposicion concreto:
- Elimina e recorte di salario di 12.6%;
2. Elimina e medidanan den cuido medico pa nos pueblo pa no trece nan salud den peliger y reconoce e valor di e trabao di esnan den cuido;
3. Preveni y elimina e aumento drastico di schoolgeld di e scolnan di SKOA dor di soluciona e problema di werksternan manera indica dor di e landsbemiddelaar;
4. Introduci een bijstand pa famianan cu tin yiunan cu tin necesidadnan special.
Un di e criticanan di Wever-Croes y Maduro ta cu e presupuesto alternativa lo no ta funda cu cifranan. Un mirada cortico caba den e presupuesto alternativa ta mustra un imagen completamente otro. Den e introduccion di e presupuesto alternativa ya caba fraccion di AVP ta duna muestra di un cambio den e balansa di cifranan pa aloca fondonan pa sostene e solucionnan den e presupuesto alternativa.
Ademas por lesa den e presupuesto alternativa cu na final di e splicacion di cada proposicion ta priorita di nobo e sumanan den e presupuesto cu ta necesario y ta menciona con concretamente ta financia e proposicionnan.
- E proposicion pa cambio den e presupuesto di pais Aruba pa aña 2022 cu ta para e recorte di 12.6% mester wordo financia dor di spar riba e gastonan di personal dor di un ehecucion adecua y sistematico di e “Beleidsplan Verlaging Personeelslasten”;
- Pa medio di un contribucion di pais Aruba di 24 miyon pa e resto di 9 luna di 2022, ta sali di e begrotingspost “Goederen en Diensten”. Den e concepto di Presupuesto di pais Aruba pa aña 2022 e deficit di AZV pa gran parti mester wordo cubri cu medidanan devastador. Cu e solucion di e presupuesto alternativa e medidanan draconico den cuido medico cu ta bay wordo introduci dor di Gabinete Wever-Croes por wordo evita.
- Pa soluciona e problema di SKOA e prespuesto alternativa ta mustra cu e gastonan pa e cambionan aki ta un suma calcula na 1.5 miyon pa mita di e aña presupuestario y lo bin di e post “Goederen en Diensten” di presupuesto 2022.
- E gastonan pa ehecucion di e bijstand nobo cu Fraccion di AVP kier introduce pa famianan cu un mucha cu handicap tambe ta bin for di e post goedren en diensten cu segun Raad van Advies gobierno a ponedemasaiado halto.
Ademas e proposicionnan den e presupuesto alternativa no ta indica solamente – otro cu gobierno kier laga mustra – di ta bon funda pa loke ta cifranan, pero tin den dje tambe como e base di su fundamento un vonnis di Gerecht in eerste Aanleg, consehonan di Raad van Advies, cartanan di henter e sector di cuido y di dr. HOH, di SKOA como tambe di CAft y un proposicion di iniciativa entrega caba dor di Eman y Wyatt-Ras pa introduccion di un bijstand pa muchanan di necesidadnan special.
Lo a keda Gabinete Wever-Croes netchi si e lo a reacciona riba nivel y cu contenido riba e iniciativa toch hopi extraordinario di oposicion enbes di bay den un atake polarisante y hopi baio nivel. E Presupuesto Alternativa di fraccion di AVP no a haya mayoria absoluto. E fraccion por sinti su mes sosteni si cu dor di e reaccion meskino di parti di gobierno su presupuesto solido y cu cifranan funda a gana mas aun na credibilidad den comunidad. Eman ta bisa cu e tiulo di e presupuesto alternativa “Mester por otro. Mester ta otro” ta haya asina un nificacion mas amplio cu djis solamente un indicacion na e presupuesto alternativa, pero ta duna muestra di e necesidad di un cambio den e ‘mindset’ den gobernacion di Aruba.