Cifranan mas actual di CBS ta confirma un aumento dramatico di costo di bida e ultimo cuater anja. E redoblacion di BBO na 2019 combina cu un serie di otro medida di Gabinete Wever Croes a afecta prijsnan considerablemente. Un famia di cuater persona cu na 2017 tabata tin mester di Afl. 4.338,== pa sobrebibi awor tin mester Afl.4.896,== pa sobrebibi según e ultimo cifranan di CBS. Un aumento di Afl. 558,== pa luna. Riba esaki Gabinete Wever Croes kier introduci pago pa remedi, pago pa bai dokter, pago pa receta, pago pa bai Eerste Hulp y un BTW cu lo mester ranca 160 miyon florin mas di pueblo”. Esaki ta un maneho devastador pa nos pueblo y nos economia, e lider di Fraccion di AVP, mr. Mike Eman a comparti cu Prensa.
E lider di AVP, mr. Mike Eman ta bisa cu gobierno mester enfoca riba recuperacion economico envez di keda coba den saco di comunidad. Fraccion di AVP a haci proposicionnan tambe pa juda mehora poder di compra cu introduccion di un huurtoeslag den e espirito di reparatietoeslag. Tambe Fraccion di AVP a entrega un proposicion di cambio di Landsbesluit pa duna famia cu muchanan special un aporte financiero. E enfoke mester ta riba recuperacion economico y fortalece poder di compra y no mas medida, e lider di Fraccion di AVP, mr. Mike Eman ta envatisa.
Cu mas medida nos comunidad y nos economía ta worde afecta severamente”. Eman ta referi na un estudio di Banco Central di Aruba di e estado di e situacion
socio-economico di bienestar di hogarnan na Aruba, “Financial Wellbeing of Households”. E estudio di Banco Central ta confirma e pobresa cu nos ta mira den comunidad e lider di fraccion di AVP mr, Mike Eman ta expresa. Eman ta cita e relato riba e rapport: “e resultadonan ta confirma cu mas cu 60 porciento di famianan den nos comunidad a keda afecta door di perdida di entrada”. Banco Central ta confirma cu esaki ta un caida grandi compara cu dos anja pasa. “Esaki a afecta no solamente e poder di compra di hogar sino tambe e bienestar general di famia”.
Mr. Mike Eman ta haya hopi preocupante tambe cu e empobrecimento a haci e repartición di entrada na Aruba hopi mas malo. Nos a sclama contra di redoblacion di BBO y otro medidanan cu a afecta poder di compra y tambe nos a pidi pa socialisa e subsidio di salario pa esnan di menos entrada haya 100% cubri pa evita e empobrecimento y empeora e equidad den distribucion di entrada na Aruba. Pero no tabata tin oido. Awe Banco Central ta alarma “cu e diferencia den entrada entre hogarnan a bira mas grandi y cu e nivel di probresa relativo a crece”.
E efecto di e perdida di poder di compra ta hopi penoso pa nos hogarnan, Eman ta accentua y ta mustra cu esaki tambe ta afecta e economía en general. Aki tambe e lider di AVP ta cita un parti di e rapport di Banco Central: “Household consumption is readily recognized as one of the key drivers for economic development. More than half of Aruba’s gross domestic production (GDP) depends on the financial position and wellbeing of the households”.
Matando e poder di compra manera nos ta mira den e serie di medidanan pa bin ainda lo sigui empobrece Aruba y lo keda debilita un motor principal di nos economía cu ta e consumo di nos hogarnan cu ta depende di nan situacion financiero. E hecho cu no tin perspectiva pa mehoracion caba ta crea preocupacion, depression nacional y stress mental den nos horgarnan, e líder di AVP mr. Mike Eman ta bisa. Esaki tampoco ta yuda recuperacion di e factor consumo den nos economía e ta agrega mustrando riba e cifra di 47% den e estudio di Banco Central cu ta bisa cu nan ta preocupa cu nan finanzas pa e siguiente seis luna aki.