Aruba tin un Prome Minister cu tin un hobby hopi curioso pero tambe hopi peligroso ya cu ora un prome mandatario di un pais tin como hobby gaña su pueblo, esaki ta bira algo hopi serio y hopi peligroso.
“Aruba tin un Prome Minister den persona di lider di MEP, Evelyn Wever Croes, no no sa mas con pa troce e berdad cu e tin cu bisa pueblo pero e ta realmente determina pa kera cu e por gaña pueblo cuanto cu e kier y ki ora cu e kier.
Dialuna ultimo 18 di mei, un biaha mas pueblo a wordo engaña formalmente ora cu e Evelyn ta bin dilanti y cu cara serio, ta mustra tur hende cu palabracion cu el a haci como Prome Minister cu Hulanda, ta algo cu no por kibra.
Pues den forma bon cla e Prome Minister aki ta bisa pueblo cu tur loke ela firma cu Hulanda, no por cambia esakinan bou di ningun circunstancia.
Pero ta mesun Prome Minister aki, e mesun Evelyn Wever Croes aki dia 23 di maart di e aña aki, a dicidi di duna un declaracion na pueblo, cu su gobierno ta preparando un team pa bay renegocia cu Hulanda e puntonan cual el a acorda pa wordo ehecuta.
Cu otro palabra el a bisa pueblo cu no tin awa pa laba, cu tin medidanan cu el bay di acuerdo cu Hulanda, cu e no por cambia mas pa nada di munto y Evelyn tabata sa esey tambe dia 23 di maart ora cu el a anuncia cu su gobierno ta trahando un team pa bay negocia cu Hulanda.
Awor sin cu el a cab di traha e team negociado, ata e ta papia cu no por kibra palabracionnan cu el a haci caminda mas medida ta na caminda.
Aki mester mustra cu Evelyn no ta sincero cu pueblo y ni cu su propio fraccion den parlamento, ya cu te awe ningun hende sa ainda kico realmente tur e acuerdo aki ta encer y cuanto medida mas pueblo tin cu spera pa bin na vigor.
Pa anuncia algun di nan, tin e flexibilacion di e mercado laboral caminda algun hende tin cu bay cas y esaki lo drenta na vigor dia prome di februari di 2022, un medida cu mester a drenta na vigor na luna di maart ultimo pero Evelyn a manda su gobierno cas pa evita un disaster politico pa su persona y partido.
Ya caba Minister Xiomara Maduro a sigura pueblo cu na 2023 lo wordo introduci e impuesto conoci como BTW caminda cu ta un impuesto di 18% ora c’un ciudadano cumpra algo y e tin cu paga na caha.
Un medida tambe cu lo drenta na vigor dia prome di oktober 2021 lot a otro sorpresa pa trahadonan di gobierno, caminda nan lo bay perde ainda mas riba nan beneficionan secundario, cu e posibilidad cu nan lo por perde practicamente tur e beneficionan aki, ya cu ainda ningun hende ni parlamento, sa kico Evelyn a firm ana Hulanda.
Riba dje pa dia 15 di februari 2022, gobierno segun loke Evelyn a firma cu Hulanda, lo tin cu bay over na retiro di un grupo grandi di ambtenaar, pa asina reduci costo di personal segun acorda pa e lider di MEP.
Pero asina mes Prome Minister ta trata di hunga su rol di bon hende mientras cu ta su persona na maart a bisa cu e lo manda un ekipo pa Hulanda pa renegocia e acuerdo pa e siman aki e bin atrobe y bsia cu esaki no ta posibel,” Marlon Sneek lider di fraccion di AVP a declara.
