ORANJESTAD,Aruba
Aña 2020 a drenta pero ainda pueblo ta bibando den un incertidumbre total ya cu ainda pueblo no sa kico ta spera nan y cu gabinete Wever Croes no a ni presenta presupuesto 2020 na parlamento.
Lider di fraccion di AVP, sr Marlon Sneek a mustra cu aña 2020 a inicia pero ainda gobierno no a presenta presupuesto nobo pa asina por mira si gobierno ta bay cumpli cu loke el a priminti den campaña electoral.
“Esaki ta e gobierno cu a bisa pueblo cu salario minimo lo bay subi substancialmente, no 1% no 2% y ora cu el a papia di substancialmente a papia di un aumento di 250 florin, di 300 florin, pues un salario minimo cu Minister di Labor y Asuntonan Social, a bisa cu salario minimo tin cu bira algo cerca di 2000 florin.
Sinembargo te dia di awe pueblo no ta scuchando nada di loke Minister aki a priminti di lo haci y ta esaki ta e gobierno cu a bisa cu ora cu nan drenta gobierno, cu facilmente nan ta bay corta 50 miyon florin for di gasto di gobierno pero ainda nos ta sperando hunto cu pueblo, na unda nan ta bay corta e 50 miyon aki.
Si nos compara e presupuesto di 2017 cu nan a bisa cu nan lo reduci esaki cu 50 miyon, nos por mira cu presupeusto 2018 y 2019 ta 130 miyon mas di loke gabinete Mike Eman a laga atras.
Ningun momento no a corta na biahenan manera priminti, no a corta na deskundig advies, no a corta na gasto di persona, ya cu tur hende por corda cu gabinete Wever Croes a retira 300 funcionario kendenan supuestamente ta AVP.
Pero awe tur hende por mria cu e discusionnan cu tin cu Hulanda, ta aumento di gasto di personal, cu e gastonan aki a sigui subi, pues un mentalidad di ‘quitate tu para ponerme yo.’
Nan a bula cabes di 300 mama y tata di famia pa pone nan ‘friends and family’ y esey ta loke gabinete Wever Croes a haci y esaki ta mesun gabinete cu a sigura cu nan lo baha edad di pensioen.
Pesey nos ta ansioso pa mira e presupuesto di 2020 pa mira si a cumpli cu pueblo ya cu despues cu nan presenta presupuesto 2020, e presupuesto di 2021 no ta bay yega Parlamento ya cu lo ta aña di eleccion.
Pues akinan ta e momento pa e gobierno aki demostra cu tur loke nan a priminti, cu di berdad nan lo cumpli cu esakinan cu pueblo pero lamentablemente nos tin cu mustra cu ningun caminda nos por scucha algo riba e promesanan aki haci.
Unico palabra cu nos ta tende te cu awor, ta riba ‘belasting hervorming’ cu nan ta yame pero e ‘hervorming’ aki ta nan pa asina nan haya mas placa y ningun momento ta pa pueblo paga menos.
Fraccion di AVP a manda pidi pa medio di un ‘repelbrief’ cu nos a manda dialuna atrobe caminda nos ta pidi Minister pa informa Parlamento kico ta e medidanan cu tin na caminda.
Nos a tende di ‘dividenden devisieprovisie’ cu lo bay subi loke ta bay nifica pa pueblo cu automaticamente tur producto ta bay subi ya cu e comerciente mester di e dollar pa cumpra su productonan riba mercado internacional.
Esaki ta nifica cu ora cu e bay cumpra su productonan esaki ta bay ta mas caro dor di e medida aki, caminda un dollar por bira facilmente den careda di 1.95 pa cada dollar y eynan por mira caba kico ta bay pasa cu tur producto aki na Aruba.
Tambe nos a tende di ‘sugartax’ di cual nan ta core p’e, nos a tende di bendemento di terenonan erfpacht cu companianan estatal pa saca miyones di e companianan aki y tambe nos a tende di 6% di BBO na grens cu atrobe ta bolbe nifica aumento di prijs di productonan pa e consumido, pues indicacion cu medidanan feros ta sperando pueblo di Aruba proximamente y pesey nos kier haya e presupuesto 2020 pa asina nos por analisa esaki,” lider di fraccion di AVP, Marlon Sneek a declara.