“Ta imposibel pa pensionado cu ta biba di un entrada di pensioen so por tin un bida digno cu e costo di bida actual. Sea e pensioen di SVB mester worde aumenta conciderablemente of gobierno tin cu aumenta e reparatietoeslag cu AVP a introduci pa cada pensionado conciderablemente”, asina e lider di AVP, mr. Mike Eman a expresa despues di un analysis profundo di cifranan y papiando cu pensionadonan.
PENSIONADO CU DEFICIT TUR LUNA
Eman ta bisa cu e cifranan ta papia pa nan mes. E dolor cu nos ta scucha di nos pensionadonan ta worde confirma pa e cifranan di CBS y SVB. Tanto e pensionado soltero como pareha ta core cu un deficit grandi tur luna.
Den su relato final pa anja 2022 CBS a duna di conoce cu un persona adulto mester di 2560 florin minimal pa luna pa un sobribencia digno. E pensioen di un soltero segun cifranan di SVB ta 1215 florin pa luna. Esaki kiermen cu un pensionado soltero cu ta biba su so ta core cu un deficit di 1345 florin pa luna.
Dos persona adulto, pues por ehempel un pareha pensionado mester, segun CBS, un entrada di 3840 pa luna. E pensioen di un pareha segun cifranan di SVB ta 2046 florin pa luna. Esey kiermen cu un pareha pensionado cu ta biba nan so ta core cu un deficit di 1794 florin pa luna. E lider di AVP, mr. Mike Eman ta bisa cu ta imposibel y inhusto pa laga e situacion penoso aki asina.
PENSIONADONAN DEN POBRESA Y ABANDONO
Nos pesionadonan ta sufriendo ecomicamente y ta bibando abandona dor di un gobierno cu ta subi gastonan tur luna pa pueblo, pero gobierno no ta puntra su mes con nos hendenan por sobrebibi, e lider di AVP, mr. Mike Eman ta reclama.
Eman ta mustra cu segun SVB tin 22.164 pensionado na Aruba. E cifranan aki ta mustra cu un gran majoria di nos tata, mama, abuelo, abuela ta bibando den un situacion inhusto. E situacion aki ta hopi penoso tambe pa esnan cu salarionan bao di 3500 floriin, pesey miles tin dos trabao. Esaki tambe ta un bida inhusto y cu concecuencia pa salud fysico y social di e persona y di su famia. Nos ta mira cu hopi pensionado tambe cu por ainda y logra di haya algo extra tambe ta esforza nan mes pa sobrebibi.
AVP KIER AUMENTO SUBSTANCIAL DI PENSIOEN PA NOS GRANDINAN
E lider di AVP, mr. Mike Eman ta conclui bisando cu e situacion aki ta creando un pobresa feroz y inacceptabel pa nos grandinan. E ta insisti cu e situacion doloroso aki mester conoce un cambio, un alivio mester bin urgente pa nos conciudadanonan di edad major. Eman ta bisa cu sea e placa di pensioen mester worde aumenta conciderablemente of e reparatietoeslag cu gobierno di AVP a introduci mester worde aumenta substancialmente. E ta bisa cu durante tratamento di Presupuesto 2022 y 2023 y e cambionan fiscal fraccion di AVP a presenta un prespuesto alternativa y mocionnan pa logra e aumentonan necesario pa trece un alivio pa nos grandinan. Pero e coalicion di gobierno a vota contra.
Lider di AVP mr. Mike Eman ta bisa cu no ta promer vez cu AVP ta bisa y haci e cambionan aki pa nos pensionadonan. Asina AVP a redobla e pensioen durante Gabinete Henny Eman y den nos tempo nos a introduci aumentonan di pensioen, bijstand y reparatietoeslag y schoolkindrentoeslag pa henter e nucleo di un famia por tin un bida mas husto. Tambe AVP a haci e reformanan crucial den fondonan di pensioen di SVB y APFA pa awe nan ta financieramente saludabel y solvabel. Ta ora awor pa traduci e solvabilidad aki cu henter comunidad ta contribui na dje y cu gobierno ta probecha di dje den un aumento substancial di entrada mensual pa nos pensionadonan. Eman ta bisa cu no por otro, mester bin un aumentoi substancial di pensioen pa nos grandinan, sino nos pensionadonan lo keda biba bao di e linea di sobrebibencia cu e propio CBS ta calcula tur luna.
