9 december 2002 pa 9 december 2022. E profecional Liberato Hoek ta conta su storia y trayectoria den Ambulance. Dia 9 di december ultimo Liberato Hoek a hasi 20 aña cu a cuminsa traha na Ambulance.
Un siman después a sigui : Rudy Goedgedrag, Maureen Silva, Arthur Comenencia, Nahaina Goncalves i Kenneth Cairo (d.f.m)
E tempo eynan conoci como Ambulance Dienst, un departamento di Directie VolksGezondheid.
5 di nos e tempo eynan trahando na departamento di emergencia di hospital kier a hasi un cambio den nos cuido medico pre-hospitalario, y a tuma e reto aki na serio.
Esaki lo no tabata posibel sin un vision y mission di e minister di salubridat di e tempo ey, cu tabata Candelario “Booshi” Wever, conhuntamente cu Rudolf Rafini.
Hoek ta duna elogio na e personal di ambulance cu promer cu nos a cuminsa traha, a sa di duna un bon cuido na patient cu locual nan tabata tin y cu locual nan tabata por.
Ambulance no tabatin e luho manera otro departamento nan di gobierno cu si tabata dispone di e recursonan, asina mes cu e departamento ta wordo mira como uno di vital importancia.
Asina mes e persona nan cu mester a guia e departamento aki a sa di hasi esaki como debe ser, cu tur e limitashon nan cu nan a encontra.
Pero na 2002 cu entrada di enfermeronan (verpleegkundigen) riba ambulance, bou di guia di Daniel van Heyningen (d.f.m.) y cu e vision propone, esaki a cuminsa trece cambia den cuido medico pre-hospitalario.
Na cuminsamento mi mester bisa cu e no tabata facil, mirando cu e manera di duna cuido ta diferente, cambio no ta facil i por tuma tempo pa adapta na esaki.
E publico/comunidat tambe mester a custuma cu esaki, for di e grupo aki ta caminda cu mas e critica a bin.
No por culpa nan, mirando cu nan tampoco tabata compronde na cuminsamento kiko ta stabilisa un persona den cuido medico pre-hospitalario.
Pero nos meta tabata pa duna e patient e cuido cu e tin mester di dje na e momento nan ey.
A tuma tempo pa hopi hende compronde e concepto cu cuido medico avansa por cuminsa pafor di hospital tambe, y no mester warda te ora cu yega na un hospital.
Awendia ainda tin hopi hende cu no ta compronde kiko e palabra stabilisa ta nifica y ta wak ambulance simplemente como un medio di transporte.
Tin hende hasta ta durf di wake como un taxi, sin pensa riba esun cu si tin mester di dje.
Na 2005 departamento di ambulance y nos como ambtenaar e tempo eynan a wordo uitgeleend na e plan/proyecto di e tempo eynan conoci como ImSan.
Di cual na 2013 e trahadornan mester a tuma decishon riba e status cu nan lo kier sigui cune.
Den e ultimo 20 aña nan aki hopi ta e cosnan cu a conoce desarollo positivo.
A tuma 10 aña promer cu e personal, despues di un proceso di 6 aña, por a hasi e opleiding di ambulance.
Esaki ta e mesun opleiding cu ta wordo exigi na hulanda, duna door di ambulance academie for di Hulanda.
Nos ta hasi e mesun examen nan y traha segun e mesun protocol nan.
Hopi hende por corda cu Ambulance nan color a cambia di blanco pa geel, mescos cu nos uniform.
Esaki no tabata tin nada di haber cu politica, manera hopi hende a kere of pensa, pero simplemente cu seguridat pa cu e trahador.
Nos actual directeur di ImSan Dr Joel Rajnherc, bou di cual cuido di ambulance ta cay for di 2012, a percura pa banda di locual ta materiaal di trabou, e personal ta dispone di e training nan necesario pa por duna un cuido medico di nivel halto.
Esaki conhuntamente cu nos medisch leider Dr Monica Nuboer cu ta responsabel pa e parti technico di e cuido medico pre-hospitalario.
Esaki ta motibo pakiko e personal di ambulance su enfermero nan ta e unico nan cu tin autorisacion pa por hasi sierto practica nan medico den e area pre-hospitalario.
For di 2013 cu nos ta dispone di nos mesun departamento di personal yfinancien, hopi cos ta mas facil y posibel riba tereno organisatorio, sin mester depende di otro departamento nan di gobierno.
Pa menciona un simpel ehempel, cu antes pa haña un tire pa ambulance por a dura 2-3 luna promer cu esaki ta disponible, siendo cu awor esaki ta wordo regla e mesun dia.
Esaki ta danki tambe na e bon servicio di nos garashi AutoXcellence.
Trabou riba ambulance no ta uno facil i sigur no ta pa tur hende.
Tin e pensamento cu mi kier traha riba ambulance paso mi kier sinti e “adrenaline rush”, di p.e. core cu velocidat.
Esaki ta e pensamento mas robes cu por tin si bo ta pensa pa un dia traha riba ambulance.
Trabou riba ambulance no ta simplemente detalles, sino un totalidat di procedura cu mester sigui i cu ta mara na regla.
Trabou riba ambulance ta un mundo riba su mes, tanten cu bo no ta eherce e funcion of tin un contacto directo cu e funcion, bo lo no sa kiko e ta come Y bebe.
Banda cu bo mester por domina tur e specialidat nan den e mundo di medicina somatico, bo mester por domina e area psychiatrico y alabes esun social.
Un aspecto hopi importante ta cu bo mester ta psychologicamente bon prepara y capacita pa por eherce e funcion aki, sino trabou riba ambulance no ta pas pa bo.
Ambulance awendia ta capacita pa duna cuido medico avansa di un nivel hopi halto, esaki promer cu bo haña cuido medico mas avansa na un hospital.
Hopi biaha ta lubida cu promer cu wak un dokter of specialista, ta personal di ambulance ta esun cu bo ta wak Y ta atende bo.
Sin para keto cu bo a haña sea parti of full e cuido medico (tratamento) cu tabata rekeri, for di ambulance.
Antes tratamento tabata wordo duna ora yega na un hospital, awendia tratamento ta cuminsa pafor di hospital caba, dus sea na cas of riba caya.
Un tratamento profeshonal, cu ta wordo duna den situacion of condicion nan cu hopi hende no por imagina nan mes.
Banda di beach den solo, den un mondi yena di hubada, riba caminda grandi den awacero, den un bar cu yen di hende bou di influencia, esey ta solamente un paar di nan.
Pero esaki ta trabou di ambulance, banda di duna cuido medico bou di un dak, nos ta duna cuido medico riba caya.
Esaki ta un profeshon cu bo mester tin afinidat pe.
Mi kier a gradici un y tur cu di un of otro manera a forma parti di mi trayecto di 20 aña na ambulance.
Na promer lugar yama danki na mi famia, mi casa – jiunan y nietonan, cu semper tabata para mi tras y a sostenemi den mi 20 aña nan na ambulance.
Tambe na mi familiaresnan y conocirnan cu semper a apoyami.
Sigur sin lubida na mi collega y tambe ex-coolega nan cu sin nan, cuido di ambulance lo no tabata na e nivel profeshonal cu e ta awe.
Tambe otro collega nan cu indirectamente ta un apoyo pa e parti organisatorio di ambulance.
Tambe otro departamento nan cu mi ta traha hopi di serca cu nan manera KPA, brandweer, rampenbureau, y specialmente nos meldkamer 911.
Personal di ambulance hopi biaha ta wordo yama trahadornan di ambulance of paramedico, pero den realidat nos ta “Profeshonal nan di Ambulance”, cu un conocemento y preparashon di nivel hopi halto.
Por ultimo mi kier bisa cu cuido di ambulance ta algo dynamico, e lo no funciona si bo no bai mee cu e cambionan.
Un conseho mi tin pa tur esnan cu un dia tin pensa pa traha riba ambulance : Zorg pa bo ta educa, Zorg pa bo ta bon educa y Zorg pa bo keda educa bo mes.
Esey ta e motibo cu ami mes tambe riba dia cu mi ta cumpli 20 aña di mi funcion na ambulance ta zorg pa mi cumpli cu recertification di mi Advanced Hazmat Life Support.
Bo educashon ningun hende por kita for di bo.
Cuido di ambulance awe na 2022 no ta mescos cu na 2002, y lo no ta mescos cu na 2042