Habriendo conbersashon tocante Salud Mental a traves di musica
Conocido musico Curaçoleño Levi Silvanie ta trese su projecto The School Tour y The Album Experience listening sessions nos isla otro siman, pa asina pueblo di Aruba por wordo inspira pa tene conbersashonnan habri tocante salud mental a traves di música. Dialuna 16 di Oktober di 7’or pa 9’or di anochi, Silvanie lo presenta un session special pa hende homber, diamars anochi 7-9pm un session pa educadornan, y por ultimo diaranson 7-9pm lo tin un Open Panel Discussion den cual lo tin expertonan ta tene dialogo tocante e topico importante aki. Tur session ta tuma lugar na JFK Education Center.
Cu The School Tour y The Album Experience, Silvanie kier usa e poder di música pa inicia conbersashon habri tocante salud mental y cuido personal. Un experiencia inmersivo den cual e ta compartí su música y su storia, incluyendo dialogo abierto cu profesionalnan di cuido (mental) local. Papiando di obstaculonan diario y e diferente maneranan cu por mehora of mantene un estado mental saludabel.
Danki na e apoyo di Ministerio di Educashon y Deporte di Aruba, Ministerio di Husticia y Asuntonan Social, Departamento di Enseñansa, Gianni’s Group, Elite Productions, y otro partidonan, e prome etapa di e projecto aki por wordo realisa y sostene cu plannan grandi pa futuro.
The Album Experience: Men’s edition
E prome session dialuna 16 di oktober di 7pm pa 10pm lo wordo dedica completamente na nos hende homber, cu Silvanie como anfitrion y psicologo Johnny Boekhoudt y tambe artista local Ataniro como invitadonan special.
The Album Experience: for Educators
Diamars 17 di oktober di 7pm pa 10pm, Silvanie lo jama tur educador, entre otro tur maestro y mayor, bon bini na JFK Education Center pa un session dedica special na nan.
Mental Health Panel Conversation
Finalmente ariba diaranson 18 di oktober, tambe di 7pm pa 10pm, lo tuma lugar un Open Panel Discussion. Ariba e anochi aki pueblo henter ta bon bini pa atende y scucha un panel di diferente representante di partidonan clave cu lo discuti obstaculonan y solushonnan relata na Salud Mental na Aruba.
E Panel lo consisti di:
-Minister Rocco Tjon, representando Ministerio di Husticia y Asuntonan Social
-Dr H van Gaalen, representando Respaldo
-Parlamentario Sra Raymichelline Raymond
-Sra Maureen Kelly, representando Cliëntenraad GGZ
-Sra Aldona Blijden, di parti AZV
-Sr Randall van Trigt di Stichting Hunto
-Sr Ru Croes, ex director di AZV, lo actua como moderador.
Porta ta sera 7:30pm.
Tur session ta tuma lugar na JFK Education Center, Stadionweg na Oranjestad. Participashon ta completamente gratis, pero registrashon ta necesario como cu tin 100 cupo so pa cada session. Pa mas informashon y e linknan pa registra, bishita https://www.facebook.com/LeviSilvanie
‘The School Tour’ ta bek!
Despues di un pilot exitoso na April di 2022, The School Tour ta bolbe bek nos isla otro siman. Ariba e maintanan di dia 16, 17, y 18 di oktober lo tin session nan special pa hoben di scol secundario. Inscripshon pa esakinan ja caba ta sera, y ta conta participashon di Filomena Collega, Maria College y Colegio Arubano, cu 100 mucha cada mainta. Ja caba ta planea pa expande e projecto otro anja pa asina tur scol por hanja oportunidad pa participa. E projecto ta wordo hasi posibel cu sosten di Gobierno di Aruba.
Salud Mental
Un den cada cuatro persona ta experiencia problema cu salud mental of un enfermedad mental. Mitar di tur caso ta cuminsa na of prome cu edad di 14 anja, y suicidio pa motibo di depresión ta e di 4 causa di morto mas común den esnan entre 15 cu 29 anja di edad. Den nos comunidad, problema cu salud mental masha poco ta wordo reconocí of papia, y hopi bes ta wordo mira manera un berguensa. Esaki por descurasha hende di papia tocante nan salud mental of busca ayudo. Dos siman pasa, Levi a guia un serie di ‘Album Experience’ listening sessions pa Mental Health Caribbean riba e isla di Boneiro. Hasiendo session nan pa patient, e team di MHC y diferente otro health care professionals di e isla. E session nan aki a mustra di tin un impacto positivo dentro di e organisashon, judando algun di e individuonan mas reserva pa mustra mas habri dilanti nan companjeronan. Awor Levi ta continua pa e School Tour, empoderando e generashon mas joven pa tene conbersashon nan tocante saludo mental y cuido personal na bida.
gs’me:miss
Despues di 10 anja, Levi Silvanie ta bolbe cu un album y un mision nobo: “usa mi música y storia pa empodera otronan cu ta sufri den silencio”.
gs’me:miss ta Silvanie su prome album den dies anja. Un obra frágil di 13 cantica den cual e ta habri su mes tocante su bida, su lucha, y crecemento. E album ta pinta un imagen conmovedor di e evolushon di Levi Silvanie for di ‘djis mi mes’ pa ’gs’me:miss’; for di su subida pa fama y su bataya cu salud mental, te na descubrí con pa keda fiel na su mes. Inspira pa e batayanan personal aki, Levi a cuminsa un movimento dos anja pasa cu e focus riba salud mental pa hoben y adulto. Usando gs’me:miss como herment, ela desaroya un programa exitoso pa trese empoderamento musical na scolnan, companianan y casnan.
