Despues di 10 anja, artista Curaçoleño Levi Silvanie ta bolbe cu un album y un mision nobo: “usa mi música y storia pa empodera otronan cu ta sufri den silencio”. Diabierna 14 di April venidero, Silvanie lo duna un presentashon na Cas di Cultura (CdC). Na Oktober e anja aki e lo lanza un proyecto pa concientisashon di salud mental, cu enfoke riba hobennan di scol secundario na Aruba, Boneiro y Corsow.
Un den cada cuatro persona ta experiencia problema cu salud mental of un enfermedad mental. Mitar di tur caso ta cuminsa na of prome cu edad di 14 anja, y suicidio pa motibo di depresión ta e di 4 causa di morto mas común den esnan entre 15 cu 29 anja di edad. Den nos comunidad, problema cu salud mental masha poco ta wordo reconocí of papia, y hopi bes ta wordo mira manera un berguensa. Esaki por descurasha hende di papia tocante nan salud mental of busca ayudo.
gs’me:miss
gs’me:miss ta Silvanie su prome album den dies anja. Un obra frágil di 13 cantica den cual e ta habri su mes tocante su bida, su lucha, y crecemento. E album ta pinta un imagen conmovedor di e evolushon di Levi Silvanie for di ‘djis mi mes’ pa ’gs’me:miss’; for di su subida pa fama y su bataya cu salud mental, te na descubrí con pa keda fiel na su mes. Inspira pa e batayanan personal aki, Levi a cuminsa un movimento dos anja pasa cu e focus riba salud mental pa hoben y adulto. Usando gs’me:miss como herment, ela desaroya un programa exitoso pa trese empoderamento musical na scolnan, companianan y casnan.
Presentashon na Aruba y Korsou
Diabierna 14 di April di 7’or pa 9’or di anochi, Levi Silvanie lo duna un presentashon musical na CdC. Tin cupo pa no mas cu 100 persona. Pa cumpra karchi por tuma contact cu CdC na www.casdicultura.aw, manda un email na info@casdicultura.aw, of jama 582 1010.
‘The School Tour’ ta bin bek!
Despues di un pilot exitoso na April di 2022, The School Tour lo bolbe bek e islanan ABC den e anja escolar 2023-2024. E tour aki tawata inicialmente planea pa tuma lugar e luna aki, pero pa motibo di un cantidad grandi di aplicashon di scolnan y studiantenan y e consecuencianan logístico, esaki a wordo posponi pa Oktober 2023. Cu e School Tour y su album nobo, Silvanie kier usa e poder di música pa inicia conbersashon habri tocante salud mental y cuido personal. Un experiencia inmersivo den cual e ta compartí su música y su storia, incluyendo dialogo abierto cu profesionalnan di cuido (mental) local. Papiando di obstaculonan diario y e diferente maneranan cu por mehora of mantene un estado mental saludabel.
Danki na e apoyo di Minister di Educashon y Deporte di Aruba, Universidad di Aruba/Shoco Wellness, Medwork, y otro partidonan, The School Tour lo bini Aruba pronto. Banda di e sessionnan pa scolnan, lo tin session pa mayor y pa hende homber tambe. Cada session di The School Tour lo incluí un Health Pavillion, den colaborashon cu profesionalnan local. E Health Pavillion lo tin un variedad di profesional di salud y bienestar unda bo por hanja asistencia di biaha y ricibi informashon. Ora ta trata cuido di salud, semper tin espacio pa mehora. Pa es motibo lo tin un ‘open panel discussion’ tambe pa papia tocante e retonan actual na Aruba y posibel solushonnan.
Participashon na tur e eventonan di The School Tour lo ta completamente gratis, pero registrashon ta necesario. Tur scol secundario na Aruba por registra prome cu dia 1 di Mei 2023, via e website levisilvanie.com/schooltour of por manda un email na production@levisilvanie.com. E meta ta pa jega na mas hopi studiante posibel. Pa sostene The School Tour, por manda un email na management@levisilvanie.com pa mas informashon tocante sponsoring y donashon. Pa prensa y otro pregunta por email management@levisilvanie.com.
Pa mas informashon tocante The School Tour, bishita levisilvanie.com/schooltour.
