Biblioteka públiko Boneiru ta ofresé entrante 6 di mei 2024 kurso
grátis di kòmpiuter ‘Klek i Taip’. Durante e lèsnan di kòmpiuter na papiamentu, e
partisipantenan ta siña traha ku Word, Powerpoint, Excell, Microsoft Outlook. E
partisipantenan ta siña entre otro pa traha ku ‘template’, traha grafik, tene agènda,
manda mail i hopi kos mas. Ta trata di 14 lès ku tin entrante di 6 di mei tur djaluna
di 17:30 – 19:30 or. Partisipantenan por registrá via mail na
eventsbibliotekapubliko@bonairegov.com òf via telefòn na number 715 5344, por
registrá personalmente tambe na biblioteka, Kaya Gramèl s/n.
Bonaire Information Technology Education & Support, BITES, ta duna e lèsnan di
kòmpiuter grátis. Esaki ta riba enkargo di biblioteka. Ta pa di dos biaha e aña akí
ku biblioteka ta ofresé e kurso di kòmpiuter ‘Klek i Taip.’ Djaluna 8 di aprel
partisipantenan na un kurso anterior a risibí nan sertifikado. Por lo general e
partisipantenan tabata hende di 60 aña bai ariba. Tur partisipante tabata
entusiasmá ku e lèsnan ku nan a haña.
E lèsnan di kòmpiuter grátis ta kuadra ku vishon di biblioteka tokante su ròl den
komunidat, asina Jennifer Pocornie-Martis, hefe di biblioteka ta splika. “Biblioteka
tin e tarea di yuda siudadano pa siña abilidat básiko ku ta importante den e tempu
akí. Manera e abilidat pa traha ku kòmpiuter. Na fin di e kurso ‘Klek i Taip’ e
partisipantenan a bisa ku nan ke un kurso siguiente. Nos tabata masha kontentu
ku esei, pasó ora nan a ekspresá nan deseo, nos tabatin un kurso siguiente reglá
kaba pa nan.”
