ORANJESTAD,Aruba
Lekmento di e lista di pashentnan cu a test positivo den fin di siman, ta algo serio cu merece di wordo investiga den su totalidad y esunnan responsabel tin cu carga e consecuencia di nan acto pa no cumplimento di regla y leynan existente pa loke ta secrecia medico di cada pashent.
Aruba a yega di conoce den pasado cu hasta autoridadnan policial no por a djis yega pidi informacion riba un pashent cu a yega hospital pa tratamento, ya cu tin reglanan estricto pa cu esaki y ta solamente pa medio di un proceso legal, e informacion aki lo por wordo duna.
Den fin di siman comunidad a wordo sacudi, principalmente ciudadanonan cu a bay test y a test positivo, cu un lista ta bayendo rond cu nomber di tur persona cu a test positivo, violando nan derecho como ciudadano riba e particularidad aki.
Minister di Salubridad a ordena mesora un investigacion profundo den e asunto aki cual investigacion ainda no a keda conclui pero hecho ta cu tin hendenan cu ta responsabel pa maneho di e departamento di cuido medico, kendenan tambe tin cu wordo cuestiona si no logra haya esunnan culpabel pa e acto aki.
Hopi e pashentnan no por a kere ora cu den fin di siman nan a wordo yama pa famia y amigonan, mustando cu nan nomber ta aparece riba e lista di pashentnan cu a test positivo, cual hecho ta pone cu nan lo wordo trata tin ora den un forma hasta descriminatorio y nan tin cu wanta hasta insultonan di hendenan cu a lesa e lista y ta atende nan awor riba esaki.
E asunto aki ta hopi serio y hopi delicado y den e proceso cu ta tumando luga actualmente cu e testnan cu ta wordo haci, mester por haya e link of fuente di ta kende a suministra e lista aki na tercera personanan cu no tin derecho di ni sikiera sa di e lista aki, corda nan haya informacion di pashentnan envolvi.
E momento a yega, sigur den un pandemia cu ta afectando henter comunidad, tanto esunnan cu a test positivo como otronan cu no tin ningun tipo di sintima of ta malo di corvid, pa haya aclaracion kico a tuma luga y esunnan responsabel pa e hecho aki, tin cu wordo atendi y wordo supendi y den caso caso hasta wordo retira pa e fayo cu el a comete.
Ta conoci cu funcionarionan publico ta huramenta na momento cu nan bira funcionarionan oficial den un of otro departamento di gobierno, caminda nan tin cierto regla y hasta leynan existente na cual nan tin cu atene nan mes y secrecia di trabou por ta diferente y den algun caso e ta mas serio cu otro departamentonan.
Den pasado a yega di suspende funcionarionan pa viola e reglanan aki pa violacion di esakinan cu no tin un repercucion asina serio manera den e caso den cuido medico di nos pais.
Hasta den comunidad tin hende ta kere cu Director di Salubridad publico, contra kende ta conoci cu tin hopi funcionario cu ta traha den e departamento aki no ta contento cu su maneho, ta e prome yama pa para responsabel pa e fayo serio aki.
Ta conoci cu e Director den pasado a wordo manda cas pa Minister di Salud Publico sr Dangui Oduber pero el a haya rason den Corte pa e bolbe bek na pia di trabou mientras cu tin otro funcionarionan cu tambe tin cu para responsabel pa esunnan cu ta funciona bou di nan encargo.
Pueblo ta spera un solucion y aclaracion den henter e asunto serio aki y ta spera cu esunnan responsabel wordo atendi den e forma mas estricto posibel ya cu esaki ta un violacion hopi serio di derecho d pashentnan.
