Diabierna ultimo gobierno di Aruba a duna un presentacion di algun parti di e Landspakket. Prome Minister Evelyn Wever Croes a habri e mainta y a duna di conoce cu dia 13 di November 2020, gobierno di Aruba a firma un onderlinge regeling cu Hulanda riba e tema di Landspakket y esaki ta palabracionnan cu a keda haci na comienso di e Pandemia cu ta condicionnan pa Aruba por haya sosten di likides.
Durante di e periodo Aruba a ricibi 900 miyon florin na sosten di likides y un di e condicionnan ta cu Aruba mester mester implementa algun reformanan pa ta sigur cu Aruba ta sali mas fuerte y mas resiliente di e crisis.
Casi dos aña pasa Prome minister di Aruba Evelyn Wever Croes a firma e Landspakket y esaki ta un pakete cu ta pasonan di reforma cu a tuma y cu ta riba 8 tereno. Tereno A- ta riba e maneho finansiero , B- gasto y efectividad di sector publico, C –Impuesto, D- Sector finansiero, E –reforma nan economico, F- Cuido,G –enseñansa, Fortificacion di estado di derecho. Un total di 8 area cu Aruba a palabra cu Hulanda.
Segun Prome minister di Aruba e areanan no ta cambia nan ta keda mes un cos. Cada kwartaal ta palabra e agenda mirando cu cada area tin diferente pasonan pa tuma pa asina yega e meta final. Na final di un kwartaal ta haci un reportahe final pa asina tin un bista na unda ta para, si ta canando e caminda bon of no ta canando e caminda bon.
Na e momentonan aki den e 8 areanan tin 63 accion cu ta tumando luga simultaneamente, esaki ta significa cu e Landspakket den e kwartaal aki 63 diferente accion cu e team cu ta e weso di lomba di gobierno ta pasa aden item pa item y ta comparti esaki cu prensa di Aruba.
Segun prome Minister di Aruba ta importante pa prensa di Aruba ta na altura con e Landspakket ta hinca den otro y pa prensa tin tur e oportunidad den tur trankilidad pa haci pregunta. Pesey mes a tuma e decision di pone un forum cu prensa. E profesionalnan den gobierno cu ta apunta ta esunnan cu ta encarga e Landspakket. E team cu ta traha riba e Landspakket ta e trekker di gobierno y nan ta esunnan cu ta haci e trabao grandi cu nan ta haci banda di nan trabao diario pa Aruba.
