Permiti’mi, como e Poeta local di Aruba Lady Ruth, dedica algun palabra di pabien y gradicimento na tur cu ta traha den Prensa, profesional diploma of no. Tur cu a siña move y practica di skirbi, relata, saca potret y of tene entrevista den e mundo aki pa informa y re-educa pueblo den tur area posibel.
Tur cu ta traha nochi y dia den prensa cu curason, cu pasion, honestidad y sinceridad. Un trabao no facil tur ora, ora ta publica informacionnan cu su dos banda di medaya.
Lady Ruth sa y conoce e trabao aki, pasobra e tambe tabata forma parti un tempo di e departamento di noticianan na Radio Kelkboom, Radio Carina y Radio Galactica FM.
Nos inspiracion pa boso ta, manera ta sigui:
Pabien y danki na tur trahando den corant, radio, online y television cu curason
ricibi y acepta nos miho deseonan pa sigui cu e trabao delicado aki na un manera serio y bon
E noticianan riba tur tereno pa informa y re-educa nos pueblo pa haya sa y pa ta bon informa
Noticianan cu tin biaha ta duro pa acepta, respeta, comprende, splica y of inspira.Social, policial, cultural, spiritual, educativo, di farandula, di arte y mucho mas
Aruba, un isla chikito, bon informa cu respet bibando na paz cu bendicion den cada cas.
Shonnan, gosa di boso dia y sigui cumpli cu boso trabao debidamente y seriamente.
Palabra por identifica, palabra por kibra. Palabra por stima, palabra por lubida.
Corda e grandi nan cu ya no tey mas, cu a laga bon ehempel nan pa nos tur .
Cu un danki diki grandi gordo special na e pilarnan fuerte y sabi di Bon Dia, Diario, Solo di Pueblo y EarubianoNews. Bosonan ta coleganan den prensa sin envidia pasobra bosonan ta profesional cu curason. Danki pa demostra na tur lector, cu , boso ta hendenan bon studia , bon educa, cu comprension y amor. Pabien ariba boso Dia di Prensa !