E decision di Azv pa prohibi pashentnan pa bay e laboratorio cu nan kier pa testnan si specialista, incluyendo Laboratorio Familiar, na unda nan ta bayendo pa mas di 37 aña caba, lo afecta nos comunidad inmensamente.
Pa 37 aña, Laboratorio Familiar, nos prome laboratorio priva na Aruba, ta forma parti integral di e sistema di Salud di nos comunidad. “Mi a traha asina duro y incansablemente pa construi un laboratorio c’un servicio amabel, un ambiente cu confianza y un LABORATORIO ACREDITA. Nos pashentnan ta stima nos. Pero pa aña nan largo nos ta sinti cu nos ta keda persigui pa AZV, sin ningun motibo. Nos a gana 3 caso den corte caba durante e añanan 2004 pa 2011.
Ora nos a kere cu porfin e persecucion a caba y cu nos por sigi traha na paz, pa nos sorpresa nos a haya un otro anuncio cruel cu AZV cu lo bai prohibi nos pashentnan, cu ta cu nos pa decada nan caba, cu nos a traha hopi duro pa gana nan confianza y cariño y cu ta beneficiando hopi tempo caba di e servicio amabel y di calidad, di hasi uso di nos laboratorio pa nan testanan di specialistanan.
Ayera y awe mi a haya basta reaccion, despues cu e anuncio di AZV cu a sali den prensa. No solamente pashentnan, pero tambe famianan, amigonan y conciirnan ta asombra y ta puntra’ KICO TA E MOTIBO PA TUMA UN DECISION ASINA?
LabFam hamas ta merece un trato asina, despues di 37 aña di su servicio excelente pa e comunidad, entre otro servicio nan na cas pa su pashentnan cu no por yega serca nos, semper a cumpli cu cualquier exigencia cu AZV a bin cune.
Laboratorio Familiar ta pidi pa investiga e situacion aki pa yega na e motibo real tras di e accion aki. Nos comunidad merece transparencia y un trato husto den cuido di salud. Y Laboratorio Familiar cu si ta un laboratorio acredita, no merece un trato inhusto despues di decadanan di servicio.
