Ultimamente ta scucha mas y mas cu muchanan ta test pa Covid-19 paso nan tin sintoma of nan tabatin contacto cu un persona cu a test positivo pa Covid-19. Mirando e desaroyonan aki desde algun tempo caba LabHOH no a para keto y a busca un manera mas “kidfriendly” pa test muchanan y sigur un metodo cu tin valides cu ta loke semper LabHOH a para pe.
Na e diferente testcenters di LabHOH, esta e localidad na Hospital y tambe e localidad na Palm Beach Plaza desde awe ta test mucha diferente cu adulto. E testagents a sigui un training special na unda na prome luga ta tuma mas tempo pa pone e mucha sinti nan mes trankil y ta splica nan kico lo bay pasa ora di test pa Covid-19.
Pa haci e proceso aki uno mas agradabel posibel pa e mucha te cu 12 aña e testagents di LabHOH ta haci uzo awo di un swab cu ta flexiblel y hopi mas fini y pues no ta molestia e mucha. E test cu mucha awo ta ser haci cu e metodo conoci como “mid-turbinate”. Haciendo uzo di e metodo aki e swab tin cu bay menos profundo den e nanishi esta 1 pa 2cm dependiendo di e edad. Mey mey di e nanishi ta swab e mucha cual ta menos molester pe. E metodo di test aki tambe ta bay hunto cu e test den garganta cu ya nos conoce.
E metodo “mid-turbinate” aki a ser valida ultimo pa GGD Amsterdam y GGD West Brabant pa muchanan te cu 12 aña ya LabHOH ta content cu awo tambe por haci e saki pa e muchanan di Aruba.
Pues asina aki LabHOH kier a garantisa y alabes trankilisa mayornan cu si nan yiu tin cu test pa un of otro motibo LabHOH awo mas cu nunca te’y pa wanta nan man y guia durante e proceso aki.
