E wikènt binidero ta unu di selebrashon durante kual nos lo yama bon biní e aña nobo. Pa garantisá seguridat di tur hende riba kareteranan, polis lo bai kontrolá di mas regular i di manera mas estrikto. Durante e kòntròlnan aki agentenan lo sòru pa tur partisipante den tráfiko tene nan mes na e leinan preskribí pa nan mesun seguridat. Por ehèmpel, e uso di faha di seguridat, uso di telefòn miéntras ta manehá, uso di hèlm ora ta manehá skuter òf bròmer, e dokumentonan bálido ku shofùr mester tin i e kantidat di alkohòl ku a konsumí. Banda di esei, agentenan lo keda alerta pa tur tipo di violashon di lei di tráfiko.
Pa evitá un prosèsferbal, prohibishon di manehá, ku ta konfiská bo vehíkulo òf reibeweis, detenshon òf un aksidente riba kaminda, kuerpo ta hasi un apelashon na un i tur pa keda atento i alerta riba kaminda i tambe di bo kondukta komo shofùr. Violashon di lei lo tin konsekuensianan severo. Den luna di desèmber a parti mas ku 43 prosèsferbal pa violashon di lei di tráfiko i a detené 15 persona pa kore bou di influensia di alkohòl.
Sea un partisipante responsabel den tráfiko i tene kuenta ku otro.
Bo a mira algu sospechoso? Yama 717 8000 òf e liña di tep anónimo 9310.
