Kralendijk,Bonaire
E plan pa establesé un sitio kaminda ta kultivá alga mas i mas ta kuminsá haña forma mas konkreto. Entretantu e investigashon preliminar a avansá dje leu ei ku na luna di mart por kuminsá ku un proyekto di prueba riba nos isla. E aparatura pa hasi esei ya kaba ta na kaminda for di Hulanda.
Parke di Alga Boneiru – AlgaePARC Bonaire – ta un inisiativa di prof.dr.ir. René Wijffels di Wageningen University & Research i Entidat Públiko Boneiru. Pa hinka e proyekto di prueba i e trayekto di kontinuashon den otro a haña nos kompania di awa i elektrisidat WEB NV komo partner di koperashon.
Laboratorio
‘Na nos tereno na Barcadera nos a konstruí un fasilidat ku nos ta bai ekipá komo laboratorio. Pafó tin un baki di awa pa e reaktor den kua e alganan ta krese. Mas aleu nos tin un studiante boneriano den servisio ku di nos banda lo guia e proyekto di prueba’, asina e mènedjer di e unidat empresarial awa di bebe Hans Staring ta splika e ròl di WEB.
‘Un di motibunan ku nos ta partisipá den e proyekto aki ta ku por produsí ‘bio-fuel’ for di alga ku den futuro posibelmente nos por usa pa e proseso di produkshon di awa di bebe i elektrisidat. Un di dos motibu ta ku nos ke forma parti di e desaroyonan teknológiko den sektor di energia. E nivel di formashon ku nan ta eksigí di e hendenan ku ta traha ku e instalashonnan na WEB ta bira kada biaha mas haltu. Esaki ta ofresé oportunidatnan pa studiantenan ku ke regresá Boneiru despues di nan estudio. Tin kuponan di trabou interesante ta bira disponibel’, segun Staring.
Wageningen
E último dos aña bou di guia di prof. Wijffels a hasi investigashon den laboratorio di universidat na Wageningen pa determiná kua tipo di alga ta adekuá pa kultivá na Boneiru. ‘Pa hasi esei nos a bai ku muestra di e tiponan di alga ku tin na Boneiru. Seguidamente nos a investigá kua ta e alganan ku ta krese rápido bou di temperaturanan haltu. Awor aki nos ta na 45 grado, pero nos tin gana di bai na temperaturanan mas haltu, pasobra e ora ei por hasi ménos gastu pa friamentu. Nos ke hasi henter e proseso mas sostenibel posibel’, segun Wijffels.
E resultadonan ku nan a logra na Wageningen ta asina positivo ku nan a disidí pa trasladá e investigashon pa Boneiru, di manera ku por sigui hasi tèst bou di sirkumstansianan realístiko. Un trahadó di Wageningen University & Research a bini Boneiru promé pa prepará yegada di e aparatura.
Pa e siguiente fase di investigashon aki mester di mas òf ménos un aña. Despues di esei por ampliá e proyekto di manera ku riba un eskala un tiki mas grandi por produsí i kosechá alga. Seguidamente Wageningen University & Research lo dirigí e investigashon riba e pregunta pa kua aplikashonnan por usa e alganan ku ta bai kultivá na Boneiru mas mihó, por ehèmpel komo materia prima pa kuminda pa bestia, kosmétiko i òf kombustibel.
Blue destination
Establesimentu di un sitio pa kultivá alga no solamente ta pas den e ambishon di Boneiru pa bira e promé Blue Destination na mundu, pero tambe ta konektá perfektamente ku e meta di Kolegio Ehekutivo pa stimulá aktividatnan komersial ku ta enfoká riba desaroyo sostenibel, kaminda nos isla ta sirbi komo kamber di parto pa inovashonnan teknológiko. Posibelmente Stinapa tambe ta bai usa e laboratorio ku WEB a konstruí i ku Wageningen University & Research ta bai ekipá pa investigashon biológiko marino.
