Kresementu kontinuo di yegada internashonal na Boneiru

Prinsipalmente ku biaheronan premium i merkado nobo

E análisis di ForwardKeys, un empresa prominente pa informashon di biahe, ta mustra un tendensia di biahe ku ta kresiendo pa loke ta trata yegada internashonal na Boneiru, ku ta konkistando un merkado kompletamente nobo den e periodo despues di e pandemia.

Na aña 2022 Boneiru a surpasá e kantidat di yegada di promé ku e pandemia, un subida di 37%, i e perspektivanan pe e promé kuartal di aña 2023 ta keda favorabel ku un biaha mas un kresementu ku sifranan dòbel. E merkadonan di orígen ku ta krese mas mihó ta Hulanda, siguí pa Merka i Reino Uní.

‘Nos ta enormemente agradesido di mira e resultadonan di aña 2022 i e perspektivanan pa aña 2023. Rekuperashon di turismo tabata nos enfoke di mas importante ku metanan spesífiko, manera e kambio den tipo di biahero. ForwardKeys a hunga un ròl importante den nos esfuersonan i nos ta spera ku e kolaborashon akí ta kontinuá’, segun Miles Mercera, direktor di Tourism Corporation Bonaire (TCB). 

Loke ta mas importante ainda, ta ku un kambio a tuma lugá den e tipo di biahero ku ta biaha pa Boneiru: mas pasahero premium ‘cabin class’ i mas famia ku ta keda mas tantu tempu tambe. E kantidat di estadianan ku ta dura mas largu a subi kompará ku 2019, un oumento di 8 punto di porsentahe.

‘Un di nos strategianan komo parti di e Plan di Rekuperashon di Turismo ta un diversifikashon di bishitante den término di pais di orígen i pa inspirá biaheronan ku ke mas ku solamente sambuyá. TCB a lansa su kampaña nobo di merkadeo di marka bou di e título ‘It’s in our nature’, inkluso un wèpsait nobo i moderno www.bonaireisland.com. Ta eksitante pa mira e resultadonan akí di ForwardKeys, pasobra esaki ta yuda nos formulá strategia pa futuro i midi impakto di e kambionan ku nos a hasi’, asina Mercera a añadí.

‘Konekshon aéreo i kapasidat di stul ta keda un aspekto importante pa rekuperashon. Nos ta di opinion ku na aña 2023 Boneiru lo sigui krese so den popularidat ku su konektividat ku a mehorá i ku merkadonan klave manera Merka i merkadonan oropeo importante ku ta kresiendo, manera Reino Uní i Fransia’, segun Juan Gomez, Head of Market Intelligence di ForwardKeys.