Kresementu ekonómiko ta danki na esfuerso konhunto di Gabinete Pisas II

Parlamentario pa frakshon di MFK, Ramón Yung ta felisitá Gabinete Pisas II ku e resultado positivo indiká pa IMF últimamente i p’esei mes e ta kere ku mester duna Cesasr loke ta di Cesar i duna Gabinete Pisas II tambe loke ta toka Gabinete Pisas II.

Resientemente Fondo Monetario Internashonal den nan “Concluding Statement” a indiká ku despues di un periodo largu di kontrakshon ekonómiko, ekonomia di Kòrsou ta rekuperando danki na e kresementu den sektor di turismo i inbershonnan kuantioso den sektor privá. 

Frakshon di MFK sigur ta sumamente kontentu ku e resultadonan presentá pa IMF. Esaki ta un muestra ku tur esfuerso i sakrifisio ku Gabinete Pisas II a hasi di forma konhunto, ta dunando su frutanan. Fuera dje kresemente ekonomiko den 2021 i 2022, IMF ta premirá ku tantu 2023 komo 2024 lo bai tin kresementu ekonómiko. Inflashon tambe ta proyektá un moderashon di 3.7% den 2023 pa 2.0% den termino medio.

E maneho di finansa públiko di akuerdo ku e “Concluding Statement” ta indiká ku durante e ultimo dos añanan tabatin hopi progreso. E balance fiscal ta mustra un surplus di 0.4% di nos Produkto Interno Bruto pa aña 2022, lokual ta indiká un mehorashon di e DEFISIT di 1.6% di nos Produkto Interno Bruton a aña 2019.

Pues ku awe Kòrsou por papia di un kresementu ekonómiko, esaki ta danki na e esfuerso I sakrifisio ku Gabinete Pisas II a realisá konhuntamente. Pa frakshon di MFK ta bon pa pueblo di Kòrsou komprondé bon, ku kresementu ekonómiko ta mará na diferente faktor.

E desishon di MinPres Pisas pa habri tur frontera i eliminashon di “lockdown”, tabata e desishon prinsipal ku a kondusí na mas entrada di turista den nos país. Banda di esaki, otorgamentu di terenonan pa bibienda I proyektonan komersial i turístiko, kombiná ku aselerashon di e proseso pa otorgá pèrmitnan pa konstrukshon di mega proyektonan den e sektor di turismo i komersial, sigur tabata un impulso importante den kresementu ekonómiko di nos pais.  Pasó desaroyo den e sektor di konstrukshon sigur ta un dje katalisadónan primordial pa midi kresementu ekonómiko di un país.

Naturalmente nos mester rekonosé tambe e trabounan meritorio di tantu CTB komo CHATA den e resultado positivo den kresementu ekonómiko di nos país.

Banda di esaki, un maneho den “compliance” i mehorashon di kobransa di impuesto, kual a redundá den entre otro dunamentu di San Antoni i tambe dunamentu di restitushon di plaka di impuesto, tabata otro faktor ku a kontribuí den e esfuerso pa ekonomia di nos país por a sigui drai i optené resultadonan positivo. E “aanschrijving” pa mitigashon di preis di kombustibel sigur a yuda pa frena mas inflashon di manera ku e siudadano por a sinti ménos efekto dje oumento den preis di kombustibel. E maneho di “compliance” a krea espasio finansiero di manera ku na algun okashon kaba por a otorgá “tranchenan” pa alkansá un suma total di alrededor di 19.6 mion na CMC , di manera ku por a garantisá kontinuidat den kuido. Sin para ketu na e suma di 3.9 mion ku a inbertí den Capriles, mas 1.8 mion ku a pone disponibel pa dòkternan di kas, pendiente realisashon dje HAP.

Drechamentu di fasilidatnan na skol ku yudansa di Ulanda, invershon den i drechamentu di diferente fasilidat deportivo i inisio dje proseso di digitalisashon den sektor di enseñansa, tur huntu a kontribuí den desaroyo i kresementu ekonómiko. Pasó den e mundu moderno di awendia, digitalisashon i akumulashon di dato ta sumamente importante pa por midi kresementu ekonómiko di un país.

Den sektor di hustisia, despues di varios aña tabatin desaroyo manera drechamentu di fasilidatnan na Barber, fasilidatnan pa sera migrantenan irregular na SDKK, rekonstrukshon di kushina na SDKK i tambe aselerashon di e proseso pa otorgashon di pèrmit na migrantenan irregular, tur ta faktornan ku ta aportá den desaroyo positivo di bo ekonomia.

Resientemente a habri frontera ku Venezuela. Ku yudansa di un inyekshon di 1.5 mion florin dje ministerio pa asuntunan general, e ministerio di asuntunan sosial a duna inisio na e proseso pa

drechamentu di 100 bibienda pa esnan di menos rekurso. MinPres Pisas últimamente tabata testigu dje firmamentu di akuerdo entre RdK i Global Oil Management Group, ku lo konsentrá nan aktividatnan den produkshon i eksportashon di asfalt i despues tambe produkshon di entre otro diesel pa eksportashon.

Frakshon di MFK ta konbensí ku tur e akshonnan aki kombiná ku un maneho stringente i kontinuo den kumplimentu ku “compliance” i proksimamente introdukshon di e lei di “online gambling”, huntu ku implementashon di medidanan pa redusí gastu den e sektor di kuido, sigur lo aportá na fortifikashon i kresementu di ekonomia di nos país, mas di lokual IMF mes ta indiká den su pronóstiko pa loke ta 2023 i 2024. Ounke, mester para ketu tambe na e indikashonnan di IMF, esta ku mester bini ku mihó kondishon i òf fasilidat pa esnan mas vulnerabel, miéntras ku digitalisashon i mehorashon dje servisio públiko tambe ta aspektonan ku meresé atenshon pa dje forma ei komplementá e proseso di kresementu ekonómiko.

Frakshon di MFK ta mas ku konbensí ku Gabinete Pisas II, komo un Gabinete di pueblo, ku pueblo i pa pueblo, sigur lo mantené su mes na e programa di gobernashon i e proseso reformanan, pa asina kumpli ku e trayekto pa Kòrsou por sigui krese ekonómikamente.