Elekshon ta un derecho sagrado kaminda un pueblo den tur libertat i sin preshon ta skohe su parlamentarionan i mandatario. E echo ku yunan di Kòrsou tin e posibilidat di vota pa nan gobernantenan ta un akto demokrátiko importante ku mester balorá i kuida. Esaki pa motibu ku tin diferente pais ku no ta gosa di e derecho fundamental aki. Si nos pèrdè e derechi di voto eksistente nos lo lamentá.
Aki na Kòrsou pueblo ta bai urna pa skohe su representanten pa e órgano representativo mas haltu den nos pais ku ta Staten òf parlamentu. Pues ta un akto hopi serio kaminda pueblo ta skohe ken e kier pa kontrolá gobièrnu i traha lei den e pais aki.
Ultimo añanan mas i mas kapitalista i komersiantenan ku un kantidat di plaka a komersialisá elekshon.
Algun aña pasá e komersialisashon aki tabata un poko mas tapá pero awendia no ta tene kuenta ku nada mas. E komersialisashon ta sosodé na un manera brutal i sin niun klase di ripara i òf bèrgwensa.
Ta tapa wowo di pueblo ku un kantidat di material pa gana su voto. Material ku ta varia di produkto di balor te na sumanan kuantioso di plaka na efektivo.
E komersiante ta pòmp masha hopi plaka pa propagandanan kostoso na radio i televishon den “prime time” e orario kaminda e sintonia ta hopi haltu. Ta invertí plaka pa traha bòrchi ekstremadamente grandi na sitionan stratégiko. Ta habri i dekorá sede na diferente parti di Kòrsou.
Ku e akshonnan aki pokopoko pero sigur partidonan finansiá pa kapitalista ta probechá di e nesesidat eksistente serka pueblo. Nan ta korumpí mente di e hende, propagá i desaroyá dependensia i un mentalidat limosnero.
E kapitalistanan ku ta finansiá kampañanan polítiko sigur no ta hasi esaki pasó nan kier yuda pueblo. Alkontrario nan ta hasi esaki ku meta fiho pa enrikesé nan mes. Esaki ta e rais pa korupshon den gobièrnu pasobra e partidonan den gobièrnu tin ku kumpli ku fabornan polítiko. Den mayoria kaso e fabornan aki ta bai a kosto di desaroyo pa pueblo. Por ehèmpel un komersiante ku hopi plaka ta bai di akuerdo pa finansiá un partido polítiko pero bou di e kondishon ku ora e drenta den gobièrnu e fleksibilisá merkado laboral i kita lei di retiru. Esaki ta nifiká komplasé i enrikesé e riku na un banda i humiá e pober trahadó na e otro un banda.
Kousa Promé ta kondená e proseso di komersialisashon di elekshon i ta boga pa bini òrdu i struktura den e henter e asuntu aki. Kousa Promé ta rechasá e aktitut antipatriótiko di gobièrnu. Kousa Promé ta boga pa bini ku un maneho kaminda ta pone un kantidat di tempu igual pa kada partido pa nan haña oportunidat di splika nan filosofia, plan di akshon i kon nan kier manehá e pais aki.
Banda di esaki mester traha na formashon di hende pa trese konsiensia relashoná ku elekshon di representantenan di pais. Di e forma aki e pueblo ta bai vota a base di konsiensia i ta kontribuí pa kada biaha alkansá un nivel mas haltu di gobernashon.
