Minister Presidènt Gilmar Pisas sorprendentemente a informá sra. van Huffelen ku e ke mas tempu pa trata na saka poko venenu for di e proyekto di lei COHO. E venenu ku sr. Pisas porfin a deskubrí den COHO ta ku e tres makambanan i e minister hulandes di BZK lo tin asina tantu poder ku nan ta tuma gobernashon di Kòrsou den nan man.
E echo ei ta venenoso i lo trapa outonomia di Kòrsou seriamente. COHO ta hasi gobièrnu i e parlamentu skohé pa pueblo órganonan di gobernashon propio sin outoridat. Pisas ta rekòrdá van Huffelen ku Raad van State mes tambe a atvertí pa esaki. Ademas Pisas ta rekòrdá van Huffelen den su karta ku dia 1 di sèptèmber 2020 parlamentu a pasa un moshon ku no ta aseptá mas lei di konsenso na Kòrsou.
Un parti di e venenu ku Pisas a señalá serka van Huffelen ta tambe, ku Hulanda ta papia di invershon sin niun kaminda kuantifiká e invershonnan i anunsiá e montante di plaka ku e ta bisa di ta bai invertí den Kòrsou. E ta revelá na van Huffelen tambe ku un aparente mayoria den Staten tin problema pa entregá mas poder den man di Hulanda. Ku esaki tambe e ta informá van Huffelen ku mester saka poko venenu for di COHO pa por logra e konsenso nesesario pa e lei por pasa den Tweede Kamer.
E venenunan ku Pisas ta indiká pa nos di Kousa Promé ta venenu mortal. Kuminda venená nunka mas por ta saludabel pa niun hende. Ta tira mester tir’é afó i sòru tambe pa niun animal hañ’é pa kome. E venenu ta asina devastadó ku pa nos di Kousa Promé no por sigui niun ratu mas ku COHO. COHO mester ser eliminá pa semper komo kuminda venená. Ta un lástima ku sr. Pisas si no a yega na e konklushon aki. Sr. Pisas ke mas tempu.
E ta boga pa un Konferensha di Reino pa trata na saka poko venenu for di COHO. E argumentunan di sr. Pisas ta asina pisá ku mester deshasí di e lei COHO i stòp definitivamente di papia riba dje. Pa nos di Kousa Promé Sr. Pisas su konklushon ta kontradiktorio. E venenu ta den COHO pasobra COHO ta un lei di konsenso. Un lei di konsenso ta un lei di reino ku legisladó hulandes ta pasa den Tweede Kamer, publiká i ehekutá pa 6 aña largu riba suela di Kòrsou sin partisipashon legítimo di gobièrnu i parlamentu di Kòrsou. 1 di sèptèmber 2020 tabata tin un moshon ku a bisa ku nunka mas mester aseptá mas lei di konsenso. Pues no mester pidi mas tempu pa saka venenu for di un lei mal venená. Un lei ku venenu den dje lo venená henter un pueblo pa semper.
Pa Kousa Promé e lei COHO mester ser eliminá pa semper. Nos ta hasi un yamamentu na por lo ménos tres parlamentario pa pidi un reunion ku un solo punto di agènda: COHO. Pidi durante e reunion aki votashon pa kabes pa asina yuda Minister Presidènt haña un moshon konkreto ku e por manda pa van Huffelen kaminda e por proba ku no tin konsenso mas i ku COHO mester disparsé pa semper. Palabra ta na parlamentarionan pa skapa nos di un plato ku venenu hulandes ku lo shuata nos yu ku ñetunan.
