Tim di Epidemologia di Kòrsou a risibí resultadonan bèk for di e Sentro Virológiko di Rijksinstituut voor Gezondheid en Milieu (RIVM). E resultadonan akí ta indiká ku den e muestranan ku Kòrsou a manda, un (1) di e kasonan ta relatá na e variante di SARS-CoV-2 di Inglatera. Ta trata akí, di un muestra for di kasonan ku a tèst positivo entre e siman di 17 pa 26 di yanüari último.
Apesar ku e Tim di Epidemiologia ya a hasi investigashonnan di fuente i kontakto na momentu ku e persona aki a tèst positivo, e tim a bolbe repasá detaye i informashonnan minusiosamente na momentu ku e resultadonan di RIVM a bira konosí. E kaso aki ta trata un residente di Kòrsou ku den último periodo no a bai di biahe, pero sí tabatin kontakto ku un persona ku a bini for di Hulanda i ku tambe a tèst positivo.
Algún siman pasá nos a risibí notisia for di Aruba ku kasonan di Covid relatá na e variante di Inglatera a keda detektá. Meskos ku Aruba i otro islanan den nos region, for di Kòrsou ADC (riba petishon di tim di Epidemiologia) tambe a manda algún muestra di resultadonan positivo di te ku 4 luna atras pa e Sentro Virológiko di RIVM na Hulanda. Durante un Konferensha di Prensa di Gobièrnu di Kòrsou djaluna último, dr. Izzy Gerstenbluth a indiká ku a hasi esaki ku e meta pa determiná si akaso den resultadonan positivo ku Kòrsou tabata tin den e último 4 lunanan por a detektá presensia di un òf mas di e variantenan di SARS-CoV-2.
Tim di Epidemiologia lo kontinuá ku e investigashon riba e último desaroyo akí. Por lo pronto, Kòrsou lo manda muestranan semanalmente pa RIVM pa asina mantené bista riba posibel plamamentu di e variante aki òf otro variantenan di e vírùs.
Keda pendiente pa un Relato di Dia riba e tema awe 5 di febrüari, pa 2’or di mèrdia.
Esaki ta reiterá aun mas, e importansia pa sigui kuida i mantené mes na reglanan vigente apesar di e echo ku durante último dianan nos sífranan di kontagio diario tabata abou. Awor mas ku nunka, ta importante pa sigui tene sufisiente distansia físiko i evitá aglomerashon pa asina konhuntamente nos evitá ku kualke variante ta sigui plama den nos komunidat. Esaki, na bienestar di nos kada un i sigur esnan mas vulnerabel den nos komunidat.
