E siklo “Historia i Gobernashon na Kòrsou, organisá pa Akademia Popular Errol Scoop a sigui ku su lèsnan virtual. Djaluna último 23 di novèmber 2020 e spesialista finansiero Errol Goeloe a elaborá riba e sektor finansiero i e diferente impuestonan i formanan ku gobièrnu tin pa generá entrada manera entre otro BRK. Tambe el a trata ròl di SBAB i Ontvanger.
Señor Goeloe a splika ku Minister di finansa ta esun enkargá ku maneho finansiero di país loke ta enserá manehá finansa di pais i asuntunan monetario, kuido di asuntunan fiskal nashonal i internashonal.
Pa manehá nesesidatnan básiko di pueblo país tin mester di entrada.
Kada ministerio ta entregá un presupuesto según deseo pa final yega na e presupuesto real.
Dosente Goeloe a splika ku e entradanan aki ta bini for di e sektor fiskal bou di kua ta kai duana, inspekshon di impuesto i Landsontvanger. Financial Intelligence Unit (Cur) FIU ántes MOT, SOAB, SBAB, Landslotterij i Banko Sentral di Kòrsou i St. Maarten tambe a haña atenshon den su presentashon.
Duana ta e outoridat ku ta kobra derecho di importashon, di eksportashon i akseins pa gobièrnu a base di loke lei ta stipulá. Pa hasi e trabou duana tin diferente instumento pero tambe sankshon ora tin inkumplimentu.
Inspekshon di impuesto ta e órgano enkargá ku kalkulashon i stipulashon di impuesto.
E lei ALL (Algemene Landsverordening Landsbelastingen) ta indiká eksaktamente ken ta e entidatnan enkargá ku stipulashon di impuesto.
FIU ta e organisashon ku ta supervisá, kontrolá i raportá transeferensia di plaka inusual. Meta ta pa evitá labamentu di plaka. Por konsiderá SOAB komo e akountant interno di gobièrnu. Stichting BaB ta e órgano ku ta enkargá ku kòntròl (kontabilidat) di kumplimentu di e pagadó di impuesto. Según señor Goeloe, bon mirá Stichting BaB mester kai bou di parti fiskal.
Tin diferente tipo di impuesto i e sistema tin diferente forma pa garantisá ku ta kumpli ku e deber di paga.
Ontvanger ta e órgano enkargá ku kobransa di e “aanslagnan” ku inspektor di impuesto dekretá. E tin medionan manera lei di kobransa i di kobransa forsá pa hasi su trabou. Ontvanger mester responsabilisá pa medio di raportahe tur kobransa mensual.
.
RBK (Belastingregeling voor het koninkrijk òf Areglo di impuesto di reino ta e lei ku ta regla pa evitá pagamentu di impuesto dòbel. Pa e motibu ei tin interkambio di informashon entre paisnan den reino.
Gobièrnu ta haña su entrada entre otro pa medio di impuesto manera impuesto direkto, indirekto, retribushon i legado.
Impuesto direkto ta nifiká ku e persona ta paga gobièrnu direktamente kontrali na impuesto indirekto kaminda e pago na gobièrnu ta sosodé pa medio di un terser persona manera den kaso ora kumpra gasolin. Ta doño di pòmp ta paga gobièrnu e impuesto. Impuesto di entrada, di ganashi, impuesto di biennan inmóbil, impuesto di herensia (successiebelasting) ta kai bou di impuesto direkto. E último aki ta poko deskonosí. E ta enserá ku ora un hende heredá, haña un legado òf un donashon e tin ku paga sierto porsentahe di impuesto riba esaki. Si e no hasié inspekson por pone beslag.
Según dosente Goeloe hopi pais ta preferá hasi uzo di impuestonan indirekto pasó ta un manera mas fásil pa kobra i e risiko pa e tersera keda sin paga ta mas chikitu.
Derecho di importashon, akseins, impuesto di volúmen di benta, impuesto di transferensia ta kai bou di impuesto indirekto.
Dosente Goeloe ta mustra ku den asuntunan di impuesto tambe tin kosnan ku ta balapena kambia. Esaki ta tarea di Staten. E posibilidat pa haña rebaho di impuesto pa mantenshon di kas propio i “afschrijving” kompará ku un empresa komersial ta bal un evaluashon mas hustu.
Retribushon ta un suma ku gobièrnu ta kobra i ku tin un kontra prestashon di parti di gobiernu mará na dje manera impuesto di vehíkulo motorisá.
Otro formanan ku gobièrnu ta haña entrada ta pa medio di: prekario, stampia (Zegel), èrfpagt, hür (Huurdomein), but, legado i tambe via entradanan di dividendo di nvnan di gobièrnu.
Un aspekto masha importante den e asuntu di impuesto aki ta ku e leinan mester kontené sierto puntonan básiko pa nan tin balides. Ta referí aki na puntonan manera kon gobièrnu ta rekargá i ken ta obligá di kumpli ku e lei aki, kon ta stipulá e impuesto i e tèrmino pa paga i si tin reklamo kon tin ku hasi esaki i serka ken.
Dosente Errol Goeloe a haña hopi pregunta ku den e di dos parti di lès a haña kontesta.
Akademia Popular Errol Scoop ta invitá tur kursista pa djaluna awor dia 30 di novèmber sigui e último lès ku ta na enkargo di dosente dr. Caryl Monte ku ta bai trata ròl di Banko Sentral di Kòrsou i St. Maarten, maneho monetario, promoshon i kòntròl di tráfiko di plaka, kresementu i stabilidat ekonómiko, kòntròl di bankonan komersial.
Un gradisimentu ta bai tambe na Morgan Isenia pa su koperashon via su kompania Morgan Online. Akademia Popular Errol Scoop ta gradisí tur dosente ku a pone nan tempu i esfuerso pa duna nan kontribushon pro deo na formashon di pueblo di Kòrsou. Na Sentro di Bario Santa Maria tambe un danki spesial.
Konosementu ta un arma poderoso pa avansá!
