Lider di partido MFK, Gilmar Pisas durante 9 luna a asumí e kartera di Promé
Minister, alabes minister di Hustisia. No ta un sekreto ku partido MFK tabata enkaminando e proseso
pa yega na un kandidato pa okupashon dje kartera di Minister di hustisia ku aktualmente mester di
atenshon.
Partido MFK den e proseso pa yega na un kandidato a tene debido kuenta ku e prinsipionan di
eksperensia, konosementu i rehubenesementu di e partido. E prinsipionan aki tabata di sumo
importansia pa por a yega na e kandidato ku lo tin ku asumí e responsabilidat komo Minister di
Hustisia.
Movementu Futuro Kòrsou dia 15 di febrüari último a postulá LL.M. Shalten Hato komo kandidato
pa Minister di Hustisia. E proseso di screening a terminá i pa djabièrnè 18 di mart 2022 LL.M. Shalton
Hato lo huramentá komo Minister di Hustisia pa Gabinete Pisas II.
Na aña 2016 Hato a finalisá su maestria di derecho konstitushonal i atministrativo na Erasmus
Universiteit Rotterdam, despues ela regresá bèk Kòrsou kaminda ela uni ku e bufete di abogado
“Soliana Bonapart & Aardenburg Attorneys At Law” den e funshon komo abogado.
Na 2017 Hato a kuminsa fungi komo Landsadvocaat pa diferente ministerio, entre nan ministerio di
Hustisia. Mirando e trabou desplega a aserká Hato na 2020 pa drenta e tim di maneho di Servisio di
Atmishon fungiendo komo “Hoofd Beleid & Juridische Zaken”. Den e ròl aki Hato ta (ko)responsabel
pa e maneho general i asuntunan huridiko di Servisio di Atmishon. Banda di esaki Hato ta fungi komo
direktor suplente den ousensia di e direktor. Den e funshon aki Hato a sinta hopi ku diferente
departamentu ku ta kai bou di e minister di Hustisia i ta pone ku e tin konosementu amplio I vasto
riba kiko ta e puntonan di atenshon den e Ministerio aki.
Apesar di su edat hóben Movementu Futuro Kòrsou ta konvensí ku Shalten Hato ta disponé di e
konosementu i ekperensha pa karga e responsabilidat komo e próksimo Minister di Hustisia. MFK ta
invitá komunidat di Kòrsou pa saludá LL.M. Shalten Hato despues di su huramentashon.