MAN PIN ta aploudí ku e gobièrnu aki a tuma pòrfin un paso riba e trayekto pa mundu por atendé ku kambio di klima.
Sinembargo, for di awor nos ke lansa algun pregunta ku Minister Presidente lo haña den tratamentu di presupuesto pa asina e por ta prepará pa kontestá.
Esaki mirando ku for di 2021 frakshon di MAN den Parlamento a pidi un reunion riba vishon di Gobièrnu riba kambio di klima sin nunka Gobièrnu bini Parlamento i splika esaki.
MAN/PIN a keda sorprendi ku Minister Presidente a biaha pa COP28 na Dubai resientemente pa deliberá riba e tema di kambio di klima, sin nunka a deliberá /informá Parlamento di Kòrsou (pueblo) riba e tema importante aki, ku nos tambe ta konfronta kune dor di entre otro temporada di kalor ekstremo, temporada di sekura, aumento di nivel di laman ku ta afektá kalidat di bida di nos suidanonan i no lubida e impakto negativo riba e sektor di agrikultura i peska.
Kòrsou a tuma nota ku posterior Gobièrnu a firma un akuerdo ku Blue Planet i Alliance i Greening kaminda pa 2045 Kòrsou lo mester ta 100% liber di fosil i na COP28 na Dubai a akorda esaki pa 2050.
Tumando nota di e akuerdonan aki firma pa Kòrsou bira kompletamente liber di fosil na 2045 mientras ku e akuerdo final di COP28 na Dubai ta indiká esaki pa 2050, nos ta hasi e siguiente preguntanan na Gobièrnu.
- Kiko e akuerdo firmá pa Kòrsou ku ‘Blue Planet Alliance’ i ‘Greening the Islands’ ta nifiká pa rafinashon di krudo na Kòrsou i por konsekuensia pa operashon di nos refineria, RDK?
- Si nos isla mester ta totalmente liber di uso di produktonan di fosil (krudo) manera gasolin i diesel na 2045, ta nifiká ku un eventual operashon di nos refineria ta pa un tempu maksimo di 20 aña nos ta papia?
- Gobièrnu ta lográ haña un operador ku lo operá e refineria RDK bou di e kondishon aki konsiderando e norma di invershon ku mester keda hasi teniendo kuenta ku veredikto di korte?
- Kon Aqualectra ta bai adaptá su operashon mirando ku nan ta usa energia fosil pa generá awa i koriente? Tin un plan konkreto pa esaki kaba ?
- Kiko ta e vishon pa ku CUROIL pa 2045 mirando ku Gobiernu ke ta na 2045 kompletamente liber di energia fósil? CUROIL tin futuro pa sigui operá ku e kambio nan aki?
- A hiba kombersashon ku e diferente “stakeholders” den e sektor energetiko, manera doñonan di pomp di gasolin? Kiko tabata nan opservashon pa ku e desaroyo aki?
- Tin un maneho pa gradualmente saka outonan / trùknan di gasolin / diesel for di sirkulashon i remplasá esaki ku outonan elektroniko?
- Tin un maneho rekapasitashon di nos mekanikonan tradishonal pa por atendé ku e desaroyo nobo aki i asina nan por mantene nan entrada?
