Apesar di masha hopi reakshon di un grupo grandi [Save Zakito Curaçao, Amigunan di
Tera, Sea Turtle Conservation Curaçao, Fundashon Rif, Salba nos Playanan, Bisiñanan
Baoase, Akademia Popular Errol Scoop den nos komunidat regalamentu di mas parti di
nos teritorio na stranhero ta sigui.
Okupashon di nos áreanan na kosta ta sigui. Transformashon di nos playanan ku ta enserá daño na naturalesa i pèrdèmentu di nos kara krioyo ta sigui. Ministerio di VVRP ta keda regalá stranheronan propiedat di Kòrsou ku tur konsekuensia ku esaki ta trese kuné. Tur esaki bou di e lema “Kòrsou Pèrla den
Caribe”.
A kaba di sali publiká ku gobièrnu di Kòrsou tin intenshon di entregá un pida tereno na
Zakito na erfpacht. Ta trata aki di un pida tereno ku un grandura di alrededor di 78.050
m², ku ta keda na parti west di Zakito. Ta terenonan indiká den EOP komo terenonan ku
destinashon turístiko. Lástimamente ku aki na Kòrsou ora papia di desaroyo di
terenonan ku destinashon turístiko ta pensa únikamente riba konstrukshon di hotèl,
risòrt, apartamento, èts. Pa ki motibu un gobièrnu ku ta na punto di baha ta kore saka
un anunsio pa entrega di tereno di Kòrsou na “erfpacht” na mionarionan stranhero? E
anunsio ta bisa ku invershonistanan tin 2 siman pa inskribí. Un biaha mas pa kiko nèt
awor den porta di elekshon? Dos siman ta sufisiente pa tur esnan ku ta interesá tuma
nota i reakshoná? Of ya kaba tin un interesado ku gobièrnu ke priviligiá? Si esaki ta e
kaso nos ta papia di violashon flagrante di prinsipionan di bon gobernashon.
Pues atrobe ta bai entregá parti grandi di propiedat di Kòrsou den man di stranhero. Un
biaha mas por konstatá desaroyo pa turista loke ta nifiká limitashon grandi pa pueblo.
Un biaha mas ta limitá pueblo di yega kantu di su laman pa motibu ku ta bai entregá
propiedat di pueblo situá na un laguna i kantu di laman, den man di stranhero. Kousa
Promé ta haña mas i mas prueba ku no ta respetá leinan internashonal manera tratado
di BUPO i no ta respetá pueblo tampoko. Na 2024 un grupo grandi di sigur 23.800
hende a firma i asina mustra nan malkontentu pa e desaroyonan ku ta tumando lugá aki
na Kòrsou kaminda ta hasi kambionan drástiko na nos playanan ku konsekuensia ku
originalidat di nos playanan i laguna ta bai pèrdí. Ta hasi hopi daño na naturalesa
manera eliminashon di un kantidat di palu di mangel, lugá di brui di piska i turtuga i
diferente otro espesie. Pero mas ku tur kos ta kita propiedat di pueblo regalá otro i ta
tené pueblo pafó di e desaroyo.
Kousa Promé pa masha hopi tempu kaba ta yuda den e proseso di konsientisashon di
pueblo riba e desaroyonan kontra su derechinan i propiedatnan ku ta tumando lugá aki
na Kòrsou. Kousa Promé a tene manifestashon, siklo i charla riba e tópiko aki. Komo
movementu polítiko nos a duna sostén i partisipá aktivamente na manifestashonnan na
Baoase, na Lagun i Jeremi.
Den nos trayekto di mobilisashon i edukashon nos a organisá resientemente un
rekorida den konvoi pasando na diferente di e sitionan aki entre otro den e área ku awor
VVRP ke ofresé den purá na invershonista.
For di eksperensia riba henter nos kosta sur, kaminda tin hopi hotèl i risòrt konstruí, nos
sa ku pueblo lo haña algu di plaka di erfpacht anual i kasi nada na impuesto di ganashi.
Ademas ta opvio ku e invershonistanan aki ta haña hopi biaha ekshonerashon for di
loke pueblo lo mester haña na benefisio. Kupo di trabou tampoko pueblo tin garantía
riba dje ya ku eksperensia a mustra ku ta stranhero ta haña e trabounan aki. Alkontrario
pueblo tin ku eksperensiá kon ta tene e komo pueblo pafó di tur desaroyo riba su lugá.
Despues di e konstrukshonnan aki pueblo no por yega su playa mas pa e distraí huntu
ku su famia ni pa landa ni pa kana un ratu ni pa traha na su salú, piskadónan no por
hasi uzo mas di e áreanan ei pa nan bai piska pa gana nan pan di kada dia. Otro
aspekto importante ta ku e áreanan rondó di e proyektonan aki ta bira asina karu ku e
pueblo no por kumpra ni hür un pida tereno ei banda mas. Pues di mes e pueblo ta
keda afó. E wiriwiri ku nos gobièrnu ta haña na entrada no ta yega pa traha na niun
desaroyo sosial i edukativo responsabel pa pueblo. I pueblo poko poko ta realisá ku tur
desaroyo ta konsentrá riba stranhero. Ta parse ku gobièrnunan di turno no por pensa
riba desaroyo i bienestar di pueblo. Ta parse ku desaroyo ta únikamente traha hotèl,
apartamentu, risòrt i kondominio pa desaroyadónan hasi komèrsio ku turista. Tur kos ta
drai rondó di turismo lubidando kon vunerabel e pilar ekonómiko aki ta.
Asina Movementu Kousa Promé ta indika e situacion relashoná ku entrega di mas playa i kosta di pueblo na stranhero