Parlamentario Seferina a tuma nota ku den deporte, yunan di Kòrsou ta kibrando rèkert den e área deportivo i tambe ta sòru pa pone Kòrsou su nòmber riba mapa internashonal.
Den mesun rosea mi kier felisitá minister di Enseñansa, Siensia, Kultura i Deporte (ESKD), pa keda kere den deporte i tambe duna muchu mas atenshon na deporte. Konsiderando ku esaki ta e fuente ku ta produsí profeshonalnan ku mayan ta bira embahador di nos pais.
MLB a yega di publiká, ku Kòrsou ku ta konsistí di un poblashon di 150.000 habitante i ku a produsí 16 pelotero profeshonal ku a yega Liga Grandi di baseball, Kòrsou tin un averahe ku di kada 10.000 habitante, nos ta produsí 1 pelotero pa Liga Grandi. E estadistika aki ta surpasá tur pais na mundu.
Kòrsou den e lastu simannan ku a pasa a konosé 7 selekshon ku na diferente nivel i disiplina a sali kampion den Latino Amérika, 1 medaya di oro den waterballet, kampion di mundu pony leage, 3 oro i un bròns den kompetensia mundial di pasofino i tambe kampion di jui jitsu na Spaña. Esaki ta historia ku minister di Enseñansa, Siensia, Kultura i Deporte (ESKD) mester duna balor i apresio na kada un di e atletanan aki ku a sa di lucha i logra e premio meresidamente. Pabien na boso kada unu i danki pa saka kara di Kòrsou.
Komo miembro di partido MFK mi ta sigui bringa, vigilá i kontrolá a base di e maneho ku gobièrnu tin, pa aloká mas fondo pa e sektor di deporte. Pa asina tur deporte por sigui desaroyá i pa Kòrsou kontinuá ku produkshon di atletanan ku ta kompetí na nivel.
Pa finalisá mi ta deseá e 3 selekshonnan di Kòrsou di Little League, Junior League i tambe Intermediate League, Softball Junior League, Softball Senior League tur klase di éksito i nos ta sigur ku nan lo trese e kopanan di kampion mundial kas. Na Minor League ku ya a titula kampeon, Pabien.
