Akademia Popular Errol Scoop e ala di formashon emansipatorio di Movementu Kousa
Promé a kumpli 10 aña di eksistensia. Djaluna último dia 8 di aprel e akademia a
inougurá su siklo di aña 2024. “Kòrsou bas den su mes kas” ta nòmber di e siklo. No
ménos ku 80 siudadano interesá i motivá a inskribí pa partisipá. E promé lès tabata
“Kòrsou ta un kolonia hulandes”. Mediante legislashon eksitente den “Reino
hulandes” i tratadonan internashonal mr. dr. René V. Rosalia a splika kursistanan na
plaka chikí ku awor si a yega e momento pa Kòrsou kue rumbo pa dekolonisashon.
Rosalia a referí i sita e deklarashon resien di embahador di Barbados na CARICOM
David Comissiong. Comissiong a deklará ku Kòrsou, Aruba i Sint Maarten ta forma parti
di e 19 paisnan den Caribe ku ainda ta kolonia. Manera ta konosí dekolonisashon di
Caribe ta un prioridat di CARICOM.
Rosalia a uza ehèmpelnan kla manera artíkulonan den statüt, órgano gobernadó, leinan
di konsenso, “Onderlinge Regeling” pa mustra ku realmente Kòrsou ta un kolonia. El a
mustra tambe ku no ta eksistí gobièrnu di reino. Ta gobièrnu di Hulanda ta kambia
pèchi bira gobièrnu di reino ora ta kumbiní.
E siklo “Kòrsou bas den su mes kas” ta kontinuá djaluna awor dia 15 di aprel ku e
dosente akadémiko Errol Goeloe ku lo trata e tópiko: “Kòrsou tin sufisiente órgano di
gobernashon pa e por ta bas de su mes kas”.
Ainda tin oportunidat pa inskribí pa e siklo NOBO di Akademia Popular Errol Scoop ku
lo kulminá te dia 28 di yüni. Por tuma kontakto ku Roderick Rosario na 5126216.
Unikamente un pueblo konsiente, por haña un gobièrnu ku e ta meresé !
Un pueblo informá, ta un pueblo ku defensa