Akademia Popular Errol Scoop e ala di formashon di Movementu Kousa Promé ta kumpli e aña aki 10 aña di felis eksistensia. E Akademia aki ta organisá entrante 8 di aprel próksimo pa 28 di yüni un siklo di edukashon emansipatorio titulá:”Kòrsou bas den su mes kas”.
Ta trata di un makutu yen di konosementu i informashon ku ta konsistí di en total 12 lès duná pa dosentenan eksperensiá i kapasitá.
Meta di e siklo ta pa ilustrá ku si un pueblo ta konsiente di su identidat, su realidat i su forsa komo pueblo, e ta dispuesto pa lucha pa un dia para riba su mes pia i ta bas den su mes kas. E ta doño di su gobernashon interno i eksterno sin intervenshon di podernan stranhero ku ta mete den su asuntunan propio.
Kòrsou tin sufisiente konosementu, kapasidat i logro konkreto pa por bira un país independiente, huntu ku tur e paisnan liber i independiente chikitu i grandi riba mundu.
Durante e siklo aki lo trata entre otro tópikonan manera konstitushon nobo pa Kòrsou, pasaporte i embahada di Kòrsou, industria eksportadó di Kòrsou, produkshon di kuminda na Kòrsou, kontenido nobo pa enseñansa i kultura na Kòrsou, guera kontra korupshon, rikesa di tereno di un país, Kòrsou sin gobernadó, sin lei di konsenso i sin Statüt etc. etc.
Lèsnan ta tuma lugá tur djaluna di 6.30 pa 9.00 pm na Sentro di Bario Santa Maria
Esnan interesá por hasi kontakto ku ing. Roderick Rosario na telefon/app 5126216 òf Mariane Isenia na tel/app 6975874 i inskribí
Inskripshon ta kosta FL.35,-
Un pueblo informá ta un pueblo ku defensa.
Ta un pueblo konsiente so, ta haña un gobièrnu ku e meresé.
