E tristu notisia a drenta ku sr. Dominico F. Martina miho konosi
komo Don Martina a bai laga nos. Don Martina tabata un di e fundadornan di Partido
MAN dia 6 di febrüari 1971 i a fungi komo Lider Polítiko di MAN di 1971 te 1999. Den
su karera politiko Don tabata Diputado, Miembro di Konseho Insular di Kòrsou,
Miembro di Parlamento di Antias, Minister i Minister Presidente kual a guia 4
Gabinete.
Nos tur ta kòrda Don komo lider i vishonario kual su prinsipionan tabata Dignidat
Humano, Hustisia Sosial, Libertat i Solidaridat. Esakinan ta e prinsipionan te awe di
Partido MAN. Integridat di gobernashon ta loke semper Don a boga p’e i nos tur por
kòrda e lema MAN LIMPI DEN GOBIÈRNU. Don den politika semper a praktika e
filosofia di “hard on the issue, soft on the man”.
Don ta un politíko ku a keda rekonosé den Reino i Karibe komo un vishonario ku a
sali na interes i defensa di demokrasia i e proseso emansipatorio. Nos tur por
rekordá Don komo Minister Presidènt den e proseso pa Aruba haña su status aparte
i e diferente retonan Sosial-Ekonómiko i Finansiero ku Antias Hulandes tabata tin pa
kual mester a tuma pasonan pa entre otro mantene balor di nos florin.
Pa Partido MAN, Don a keda komo nos lider vitalisio ku semper a sa di duna su
kontribuishon i aporte den kualke proseso importante di Partido pero tambe di
Kòrsou pa kual MAN mester a tuma posishon. Na 2021 Don a risibí e
rekonosementu Doctor Honoris Causa di University of the West Indies i na 2023 a
ser nombrá komo Minister di Estado di Kòrsou pa su trabounan desplegá.
Na nòmber di Miembronan i simpatisante di Partido MAN-PIN, Direktiva ta ekstendé
nos palabranan di kondolensia i forsa na su kasá Suze, yunan Helen, Robbin i
Steven i tur demas famia, amigu i konosí di Kòrsou su lider Don Martina.
Don semper lo keda biba den nos kurason i nos lo sigui karga e prestigioso Partido
MAN ku e ideologia i filosofia ku Don semper a sembra i kultivá den nos.
Kòrsou a pèrdè un gran lider i vishonario
