KRALENDIJK, Bonaire
Ofisina Sentral di Estadístika di Hulanda ta bai asistí Entidat Públiko Boneiru pa kuminsá ku un fasilidat di data. E sistema lo suministrá Kolegio Ehekutivo ku informashon ku nan por usa ora di hasi eskohonan importante di maneho.
Kolegio Ehekutivo a pidi Ofisina Sentral di Estadístika di Hulanda pa partisipá den desaroyo di indikadónan ku ta relevante pa maneho, ku kua por mónitòr ehekushon di e programa di gobernashon 2019-2023 ‘Di nos tur, atraves di nos tur i pa nos tur’ riba algun tereno esensial di maneho, manera desaroyo sosial ekonómiko, merkado di bibienda i turismo. Ku esei por ampliá e posibilidatnan pa usuarionan di e informashon estadístiko di Ofisina Sentral di Estadístika i e informashonnan ku ta disponibel na Entidat Públiko Boneiru.
A stipulá e koperashon den un akuerdo ku diputado Elvis Tjin Asjoe a firma na nòmber di Kolegio Ehekutivo i Sylvia Kok-de Vries na nòmber di Ofisina Sentral di Estadístika di Hulanda. Ministerio di Asuntunan Interno i Relashonnan den Reino a pone e finansiamentu disponibel den kuadro di fortifikashon di e forsa di ehekushon di Entidat Públiko Boneiru.
‘E echo ku por disponé di informashonnan estadístiko konfiabel i ophetivo ta na benefisio di kalidat di desishonnan di maneho. P’esei e koperashon aki ta konektá bon ku nos ambishon pa hisa tantu e proseso di gobernashon komo e ehekushon di parti di nos aparato públiko na un nivel mas haltu’, segun diputado Elvis Tjin Asjoe.
PA BOU DI E POTRÈT:
Diputado Elvis Tjin Asjoe i direktor suplente Estadístikanan Sosial Ekonómiko i Espasial di Ofisina Sentral di Estadístika Sylvia Kok-de Vries ta firma e akuerdo di koperashon.
Na momentu di publikashon di e potrèt por fabor menshoná: Foto Nico van der Ven
