E koordinador residente interino di Nashonnan Uní pa Karibe di abla ingles i ulandes, sr. Dennis Zulu, nativo di Zambia, awe mainta a hasi un bishita di kortesia na Konseho Sosial Ekonómiko (SER). Ei e la interkambiá di idea i opinion ku e sekretariado tékniko di SER riba entre otro e ròl ku e órgano konsultivo aki ta hunga den duna kontenido na e ophetivonan di desaroyo sostenibel (Sustainable Development Goals, SDG’s) di Nashonnan Uní ku a ser priorisá pa Karibe abla ingles i hulandes, i kon su despacho lo por duna apoyo tékniko den e kuadro aki.
Sr. Zulu, e dianan aki ta na Kòrsou, pa presentá su mes ofisialmente i e lo firma un akuerdo di kooperashon ku gobièrnu di Kòrsou, mañan, djaweps 29 di sèptèmber 2022. Promé ku esei, e koordinador residente di Nashonnan Uní a konsiderá importante papia ku algun entidat di interes pa haña un bista mas kla kiko ta tumando lugá aktualmente riba tereno di implementashon di e ophetivonan di desaroyo sostenibel.
Komo koordinador residente interino di Nashonnan Uní, Sr. Zulu, ta dirigí e ekipo supregional di Nashonnan Uní, ku sede na Port of Spain, Trinidad i Tobago, i e ta e funshonario di mas altu den e sistema di desaroyo di Nashonnan Uní na nivel di paisnan individual. Den e kapasidat ei e ta traha den estrecho kolaborashon ku gobièrnunan nashonal, representando asina e interesnan i mandatonan di Nashonnan Uní. Hasiendo esaki e koordinador residente ta sòru pa diferente organismo di Nashonnan Uní uni pa por mehorá efisiensia i efikasia di nan aktividatnan operativo den e paisnan Karibeño di abla ingles i hulandes.
Riba e potrèt: Sr. Dennis Zulu (di dos di man drechi, pará), kompañá pa un miembro di su staf i e persona di kontakto di Kòrsou, huntu ku e personal tékniko di SER.