Resientemente Daisy Coffie tabata di bishita na Cargill pa pone su mes na haltura di aktividatnan di e kompania ku ta produsí salu akí na Boneiru pa e último 25 añanan for di aña 1997. Cargill tin un área di Boneiru basta grandi (13%) bou di su maneho. E kòntrakt di èrfpagt ku Entidat Públiko Boneiru (EPB) tin ku Cargill ta terminá pronto na aña 2024 i manera Sra. Coffie mes a bisa e ke pone su mes na haltura kiko ta pasando pa ora e diskushon subi mesa e sa di kiko e ta papia. Konsehal Daisy Coffie: ‘Na momentu di nos bishita na Cargill tres funshonario a risibí nos, kendenan ta Sr. Brian Donovan ku ta e Caribbean Solar Operations Manager di Cargil Salt, Sr. Daniel DeAnda ku ta e Assistant Facility Manager i Sr. Gabi Felix ku ta e Project Manager. Na promé lugá nos a haña un splikashon amplio tokante e aktividatnan rònt mundu di Cargill, esta e diferente sektornan i diferente paisnan (mas ku 70) ku nan ta operashonal den dje. Pa loke ta trata Boneiru nos a haña un splikashon di e área i nan diferente aktividatnan i envolvimentunan den e área akí. Por ehèmpel Cargill ta enkargá ku e reserva di flamingo i ta sòru pa nan ta bon protehá.’
Èrfpagt i propiedat
‘Algu ku a hala atenshon ta ku tin tereno èrfpagt pero tin tereno propiedat tambe. E playa di Saliña konosí komo Pink Beach ta tereno privá di Cargill ku for di komienso di produkshon moderno di salu a interkambiá ku gobièrnu pa e tereno kaminda e kasnan di katibu ta. E kaminda di turista na parti sùit ta pasa parsialmente riba tereno di Cargill’, segun opservashon di Daisy Coffie.
Ubikashon perfekto
‘Tambe nos a haña splikashon di e diferente maneranan ku por produsí òf mina salu, kompará ku esun ku ta apliká akí na Boneiru. E área, e sitio, e ubikashon na laman i e wer tur ta kontribuí na un situashon perfekto pa kosechá salu akinan. Pa motibu ku e área ta plat na nivel di laman ta fásil pa por laga e awa salu di laman drenta den e saliñanan. E brisa konstante ta yuda ku e parti di evaporashon i e wer seku i kayente tambe ta aselerá e produkshon. Finalmente e laman hundu hopi serka di kosta ta pone ku barkunan grandi por yega hopi serka pa karga e salu bai kuné.’
Produkshon i empleo
‘E salu ku nos ta produsí na Boneiru ta di hopi bon kalidat, no pa konsumo pero pa uso industrial. Ta us’é pa ‘home water softeners’, tinzjamentu den industria tekstilero i pa prosesá den industria petrolero.
Fabrikanan ta us’é pa produsí ‘Chlorin’ pa purifiká awa. Un tersera parti ta bai pa klientenan den Karibe, un tersera parti ta bai pa klientenan na Nortamérika i sobrá ta bai Oropa i Afrika. E awa limpi, aire limpi, hopi solo i e brisa konstante ta pone ku e proseso ta kana relativamente lihé. Ta tuma 2 pa 3 luna pa e awa di laman drenta den e bakinan te pa e kristalisá i ta kla pa kosechá. Kosecha di salu tur aña ta dura 8 pa 9 luna. Na Salt Company tin mas òf ménos 40 empleado ta traha anto ku mas òf ménos 30 empleado ta traha via kontratista’, asina konsehal Daisy Coffie a trese dilanti.
Aporte na komunidat
Terminando Daisy Coffie a agregá lo siguiente na esaki: ‘E aporte di Cargill na Boneiru ta trabou i tur e kontribushonnan ku esaki ta bin kuné manera impuesto riba suèldo (loonbelasting) i otro primanan. Tin alabes e kontribushonnan pa medio di e servisionan ku terseranan ta duna na Cargill. Tambe pago di èrfpagt i impuesto riba propiedat ta kontribushonnan na kaha di gobièrnu. Tur aña Cargill ta kontribuí ku desenas di míles di dòler na nos komunidat. Riba tres tereno Cargill ta kontribuí ku donashon i kontribushon. Esakinan ta konservashon di naturalesa, seguridat di kuminda i kultura.’
