KRALENEDIJK, Bonaire
Riba djaweps 6 di ougùstùs, a arestá un hende hòmber Hulandes di 36 aña di edat na Bonaire International Airport (BIA) riba sospecho di sea poseshon òf pasa kontrabanda narkótiko. Esaki ta kastigabel segun Lei di Opio 1960 BES.
Douane Caribisch Nederland a ehekutá e detenshon. Durante un kòntròl regular nan a topa ku aproksimadamente 1000 gram di softdrugs. A arestá e sospechoso a base di esaki i a entreg’é na Koninklijke Marechaussee. A konfiská e softdrugs.
Na aeropuerto BIA, Koninklijke Marechaussee i Douane Caribisch Nederland konhuntamente ta trahando pa identifiká i para kriminalidat ku ta pasa frontera.Riba enkargo di Ministerio Públiko, Koninklijke Marechaussee ta ehekutá e demas investigashon.
