Riba inisiativa di Entidat Públiko Boneiru (OLB), a tuma lugá un konsulta entre tur e skolnan di edukashon primaria, sekundario i vokashonal. Sylvana Janga-Serfilia (Direktorado di Komunidat i Kuido), Marian Luinstra –Passchier (Departamento di Salubridat Públiko) i Anouk Hansen (EOZ) a deliberá importansia di e medidanan di COVID-19 pa i ku e skolnan.
Entidat públiko ta komprondé e preokupashon entre e mayornan i personal. A papia ku otro tokante e impaktó di e desishon pa mantené skolnan habrí. Gezaghèber a tuma e desishon aki, mirando e investigashonnan ku mucha no ta transmití kontagio di COVID-19 rapidamente, i si nan ta infektá, masha poko nan ta bira malu. Te ainda ta parse tambe ku apenas tin kontagio na skolnan. Si e muchanan ta kontagiá i a transmiti’é na otro, hopi biaha esaki ta sosodé pafó di skol kaminda tin muchu mas kontakto ku na skol.
Temanan di diskushon tabata entre otro kon regulá e fluho di mayor i muchanan na un manera adekuá ora ta drenta i sali skol, kon pa mantené mas distansia posibel i kon pa intensivá e medidanan di higiena. Skolnan por kompartí kon nan ta hasi esaki i siña for di otro su eksperensia.
Tur presente a kompartí nan preokupashon tokante mayornan ku ta mantené e muchanan na kas. Ta komprendibel ku mayornan ta preokupá i kier protegá nan yunan. Sinembargo, no ta nesesario.
Masha poko mucha ta bira malu i masha poko ta kontagiá otro na skol. Ta hopi importante pa mucha bai skol.
E kontagionan na Boneiru ta tuma lugá mas tantu entre personanan ku ta laborá.
Departamento di Edukashon ta sigui apliká lei di edukashon obligatorio. Esaki ta nifiká den kaso di ousensia no outorisá, e ofisial lo atvertí e mayornan.
Tambe a deliberá tokante e lèsnan di gimnasio na skol. Muchanan bou di 18 aña no mester mantené distansia di 1.5 meter i por sigui praktiká deporte, tantu paden komo pafó. Pues, e lèsnan di gimnasio na skol ta kontinuá. Te ainda ta pèrmití deporte di kontakto den airu liber