Djamars 16 di februari último, Konseho Insular di Boneiru a aseptá unánimamente un moshon di MPB i UPB presentá pa Elvis Tjin Asjoe i Esther Bernabela pa atendé ku bienestar di bestia na Boneiru. Den e reunion akí Kolegio Ehekutivo a sigurá ku e kolegio ta bai tuma e moshon na serio i tambe inkorporá otro deseonan ku a bin dilanti di parti di miembronan di e konseho.
Konsehal Elvis Tjin Asjoe ta para pa bon trato di animal
“Ta probá ku ora un hende trata animal bon, nan ta trata otro hende tambe bon,” Tjin Asjoe a trese dilanti. “Meskos tambe e chèns ta grandi ku si un hende trata animal malu, e ta trata otro hende tambe malu.” P’esei Tjin Asjoe ta haña importante pa bini ku un kampaña di konsientisashon pa for di skol, muchanan siña stima i balorá bestia i trata nan bon. Tjin Asjoe ta haña tambe ku bestia por duna hende sosten emoshonal i sikológiko. Spesialmente den e periodo di covid aki, esaki ta hopi importante.
Konsehal Bernabela ku tambe a presentá e moshon a haña importante pa no solamente traha na bienestar di bestia, sino tambe trata di nobo e ordenansa aktual di kachó. “Ta importante tambe pa no solamente wak kon hende ta abusá di animal, sino tambe kon animal ta abusá di otro hende. Por ehèmpel mata kabritu, kana lòs i susha lugá.”
Pakete total
Kolegio Ehekutivo a sigurá Konseho Insular ku nan ta bai traha na un pakete total. “Gobièrnu di Boneiru ta bai traha riba e moshon akí i tambe kumpli ku tur e deseonan ku a bin dilanti. Ta un pakete. Nos ta bai atendé ku e asuntu di kabritu den Parke Washington i di buriku. Tambe nos ta bai buska ayudo eksterno i sòru pa asistensia di gobièrnu pa Konseho Insular pa prepará un ordenansa pa bienestar di bestia.”
E moshon
Puntonan importante den e moshon ta e relashon entre maltrato di animal i violensia doméstiko, legislashon aktual ku ta antikuá, ròl di animal doméstiko pa duna apoyo sikológiko, i e importansia di edukashon i konsientisashon. Den e moshon ta pidi Kolegio Ehekutivo pa “dentro di 6 te 8 siman presentá Konseho Insular un kuadro di maneho pa loke ta trata salú i bienestar di animal en general, i spesífikamente di animal doméstiko”. Ta supliká Kolegio Ehekutivo pa informá e konseho si por inkorporá e reglanan nobo den e ordenansa di 25 di yüni 1998, ku a remplasá e ‘Hondenverordening’ anterior òf ku ta bin ku un ordenansa nobo. Tambe ta pidi Kolegio Ehekutivo pa mara un kampaña di informashon i edukashon na e kuadro di maneho nobo.
