Debí na hopi pregunta i petishon ku suidadanonan boneriano ta aserká konsehal Daisy Coffie kuné, el a disidí pa duna su konseho di voto den kuadro di elekshon di Tweede Kamer. Manera ta konosí aki na Boneiru tambe nos por partisipá na elekshon di Tweede Kamer riba djarason 17 di mart awor. Konsehal Daisy Coffie su konseho di voto ta pa vota pa sra Attje Kuiken, kandidato number 4 riba lista di PvdA (Partij van de Arbeid) ku ta lista number 7. E konseho aki ta basá riba e programa elektoral di PvdA pa islanan di Hulanda Caribense (Islanan BES), kaminda na promé, di dos i di tres lugá tin kombatimentu di pobresa, un mínimo sosial i aten dé ku kosto di bida haltu. PvdA ke sòru pa ‘hasi kompra’ i ‘biba’ ta bira pagabel na nos islanan.
Mas aleu e programa elektoral di PvdA pa nos islanan ta indiká ku: ‘PvdA ta traha huntu ku e munisipionan i paisnan den parti karibense di Reino miéntras ku nos ta konsiente di nos konekshon ku otro, ku apresio pa e diferensianan. Partisipashon di e habitantenan ta importante. Laga nos kuminsá ku fortifikashon di e aporte demokrátiko di e islanan Boneiru, Sint Eustatius i Saba pa medio di duna nan representantenan derecho di hiba palabra den Tweede Kamer ora ta trata di leinan ku ta konserní e islanan.’
Tambe PvdA ta para pa un estado di derecho ku ta funshoná bon riba e islanan: ‘Kambio di klima lo tin konsekuensianan grandi pa Hulanda Karibense i e paisnan outónomo. Nos ta invertí den adaptashon di klima, energia i turismo sostenibel na e islanan. Tambe Boneiru, Sint Eustatius i Saba mester haña un ròl mas grandi den diplomasia hulandes i den nos maneho komersial. PvdA ta para tambe pa un futuro hustu na Boneiru. PvdA ta mira ku kada biaha ta bira mas difísil pa hendenan por kumpra kuminda òf paga nan hür di kas. Esaki tin ku kambia. Pa e motibu aki e mínimo sosial mester subi i gastunan di entre otro hasi kompra, biba, awa, koriente i internèt tin ku baha. Esaki tin ku kambia!’
For di nan plan elektoral ta resultá bon kla ku PvdA tin plannan konkreto pa Boneiru i ku nan ta boga na promé lugá pa atendé mas rápidamente posibel ku pobresa, na di dos lugá pa mas kas pagabel i koriente i internèt barata i na di tres lugá pa enseñansa adekuá i aksesibel. Sra Attje Kuiken banda di ta den un puesto elegibel riba lista di PvdA, e ta tambe un persona ku a bishita Boneiru na vários okashon. E tin e islanan na pechu i ta hasi pregunta i esfuerso den Tweede Kamer pa atendé asuntunan di nos islanan. Aktivamente e ta buska aliado den Tweede Kamer pa e logra su metanan relashoná ku bienestar di nos islanan BES. Pa e motibunan aki i pa un Boneiru mas hustu i mas respetá nos konseho di voto ta pa dia 17 di mart awor vota pa sra. Attje Kuiken kandidato number 4 riba lista number 7 di partido PvdA.
Mientrastantu nos hendenan mester a haña nan karchi di vota entregá na kas. E lokalidatnan pa vota ta Jong Bonaire na Playa, Kompleho Deportivo J. Nicolaas (Sporthal) na Kaya Amsterdam, Sociedad Antonio de Padua na Rincon i Kolegio Kristu Bon Wardador na Nikiboko.
Vota: lista number 7: PvdA, Puesto number 4: Attje Kuiken
Lista nr. 7 puesto nr. 4
