Segun konsehal Daisy Coffie algu insólito a tuma lugá awor ku Kolegio di supervishon finansiero (CFT) a disidí a base di lei pa e mes traha e presupuesto pa aña 2021 pa motibu ku Konseho Insular no a stipulá e presupuesto i entregá esaki na tempu, esta pa mas tardá 15 di novèmber. Daisy Coffie: ‘Aya banda sekretario di estado Raymond Knops e biaha aki si no a koperá ku Kolego Ehekutivo kende a manda pidi e sekretario di estado pa posponé entrega di presupuesto 2021. Mas bèrgwensa ta ku e sekretario di estado i tambe Kolegio di supervishon finansiero a atvertí gezaghèber na vários okashon ku Kolegio Ehekutivo i prinsipalmente e diputado enkargá ku finansa ta fayando ku e maneho finansiero di nos isla. A kita un di e derechonan fundamental di Konseho Insular, esta su derecho di stipulá presupuesto, for di dje i a pone den man di un organisashon ku no tin ningun legitimashon demokrátiko, esta unu ku pueblo boneriano no a skohe den un elekshon liber i sekreto. E diputado enkargá ku finansa ku e negligensia aki di su tarea a pone Boneiru totalmente bou di kuratela finansiero.’
Gezaghèber
‘E aktitut aki di e diputado mester di un desaprobashon fuerte di parti di nos Konseho Insular. Pero no e so, gezaghèber ku tin e tarea di kuidadó di bon gobernashon tampoko ta sali liber. E kartanan di tantu Kolegio di supervishon finansiero komo di e sekretario di estado ta indiká ku na vários okashon a hala gezaghèber su atenshon ku gobièrnu ta fayando ku e prosedura pa traha presupuesto, entregá esaki na tempu na Konseho Insular i publiká esaki pa asina Konseho Insular por hasi su trabou debidamente. Tambe den Presidio lidernan di frakshon a ekspresá nan prekupashon pa e retraso di Presupuesto 2021 na presidente di Presidio – Gezaghèber – ku alabes ta presidente di Kolegio Ehekutivo. Pa kolmo ora entregá mes no ta entregá esaki kompleto i ta falta yen di dokumento ku tambe ta stroba e proseso. Gezaghèber den esaki tambe a neglishá su tarea di supervishon,’ segun konsehal Daisy Coffie.
Desaprobashon
Mas aleu Daisy Coffie ta alegá ku ta bon pa komunidat tin informashon tokante kiko a pasa den e kaso aki. E konsehal ta splika ku lei ta preskribí ku Kolegio Ehekutivo mester entregá e presupuesto di e aña siguiente, den e kaso aki pa e aña 2021 pa mas tardá 1 di sèptèmber 2020 na Konseho Insular. Sra Coffie: ‘Esaki no a tuma lugá i ta te na 27 di òktober, esta 57 dia (8 siman) mas lat nan a entregá e presupuesto. E mesun lei ta stipulá ku Konseho Insular no por trata e presupuesto ku no ta despues ku durante 14 dia ku e presupuesto ta disponibel públikamente pa siudadanonan i/o institutonan ku tin di haber ku e presupuesto por trese nan remarke. Esaki ta nifiká ku ta te dia 11 di novèmber Konseho Insular por a kuminsá ku tratamentu di e presupuesto. Pa kolmo pa e dia ei riba petishon di gezaghèber a posponé e tratamentu pa trata e rapòrt di integridat di Bonaire Holding Maatschappij. Esaki a keda tratá 12 di novèmber i pa kolmo no a terminá ni yega na konklushon tampoko. Dia 18 di novèmber esta tres dia despues di e fecha ku lei ta stipulá ku mester entregá e presupuesto stipulá pa Konseho Insular Kolegio di supervishon finansiero ta manda e karta den kua nan ta konkluí ku a violá e leinan i ku nan mes, esta Kolegio di supervishon finansiero ta bai traha e presupuesto di 2021 sakando e derecho i outoridat aki for di man di Konseho Insular. E petishon di gezaghèber na sr. Knops pa entregá e presupuesto mas lat ta keda rechasá rotundamente ku un reakshon fuerte ku no ta tolerá mas e fayo i negligensia di kumpli di parti di Kolegio Ehekutivo i en partikular e diputado di finansa. Un desaprobashon total pues di parti di Den Haag.’
Kómplise
‘Pa nos na Boneiru ta un bòftá den kara di representantenan di pueblo, pues ta un bòftá den kara di pueblo boneriano, ku no por keda sin konsekuensia pa e diputado en kestion. Konseho Insular den su totalidat lo mester tuma un posishon, sino e konklushon ta hustifiká ku Konseho Insular ta sostené mal gobernashon i ta kómplise den esaki,’ segun konsehal Daisy Coffie di Frakshon Coffie.
