Na okashon di bishita di sekretario di estado Alexandra van Huffelen na Boneiru konsehal Daisy Coffie di Frakshon Coffie a trese lo siguiente padilanti: ‘Segun señora mes a bisa, señora no ta asina konosí ainda ku e parti karibense di Reino. Pero sí señora a akumulá hopi eksperensia den siudatnan manera Amsterdam i Rotterdam. Ta algu rekonosibel pa señora pues ora mi bisa ku tin sentenáres di munisipio na Hulanda Oropeo. Pero tin solamente un par di munisipio ku un karakter berdaderamente internashonal i ku funshonnan ku ta krusa frontera yega hopi leu. Boneiru, nos kas, ta un sitio asina. Nos isla chikitu tin un aeropuerto internashonal. Hafnan kaminda barkunan for di henter mundu ta mara. Un ekonomia ku ta atraé invershonista i trahadó for di tantu Venezuela òf Miami komo for di Milano òf Moskú. Boneiru tin un poblashon kaminda hendenan for di tur skina di mundu ta bini huntu. Boneiru tin su propio idioma i konosé un laso fuerte ku tantu nos islanan i paisnan bisiña komo nos amigunan djaleu. Konekshon den un historia kompartí, den kuminda, den loke nos ta bebe, den dianan di fiesta, den arte, den nos sentido di humor, den literatura i poesia, den músika – en breve: den tur loke ta hasi nos hende. Nos tin un laso fuerte ku por lo ménos kuater, sinku kontinente, sup-kontinente i region den mundu henter. Nos famianan i parientenan ta biba tantu na Nikiboko komo na Coro, Venezuela i tantu na Nort’i Saliña komo na Nijmegen, Hulanda.’
‘E bario Rincon, den parti nortwèst di nos isla, tabata eksistí mas ku 100 aña kaba, promé ku e promé hulandesnan ku a sali for di Amsterdam òf Middelburg a pone pia na tera na nos kosta. Personalmente mi ta orguyoso di mi diferente raisnan, pero sigur tambe di mi desendensia di esnan, pa kende ya kaba Boneiru tabata un kas, hopi promé ku asta a funda Rincon. Nos sa kiko ta nifiká pa pensa mas leu ku nos fronteranan. No nesesariamente pa komèrsio i no pa ganashi, pero pasobra pa medio di eksperensia propio durante hopi siglo nos ta realisá ku konekshon berdadero i duradero no ta surgi for di ganashi propio, pero for di eksperensianan i balornan kompartí. Mi ta bisa tur esaki ku un hemut kontentu. Mi ta bis’é ku speransa, ku optimismo i ku e firme konvikshon ku pensa mas leu ku frontera i atendé konhuntamente ku nos asuntunan, tin balor i ta ofresé bentaha pa tur parti di nos Reino’, segun Daisy Coffie.
Kontinuando ku su disertashon Daisy Coffie a bisa: ‘Kon doloroso ku e forma den kua nos struktura estatal a bira realidat por ta: awe nos ta biba huntu den un tipo di laso di kolaborashon internashonal ‘avant la lettre’, esta estilo prekursor. Asina gustosamente mi ke mira Reino komo totalidat i tambe e laso direkto entre Boneiru i Den Haag. I e laso di kolaborashon akí, meskos ku Hulanda den Benelux i Union Oropeo, tin mester di un poko amor i un poko mantenshon. Durante bo término komo sekretario di estado pa Relashonnan den Reino, na mi opinion, algun tópiko grandi lo bini riba mesa pa Boneiru:
- E kambio di klima ku lo influensiá i afektá tur isla karibense fuertemente si nos no tuma medida drástiko AWOR AKÍ.
- E desigualdat sosial i ekonómiko ku, mas ku 11 aña despues di 10-10-10, ainda no a keda kombatí fundamentalmente, ni na nos isla mes, ni entre Boneiru i Hulanda Oropeo.
- Un gobernashon ku, pa vários motibu, no tur ora ta ofresé e nivel di abilidat di resolvé problema, e efektividat i e transparensia ku nos habitantenan i votadónan por spera di nan gobièrnu.
- Haña e balansa korekto entre e karakter i e manera di biba ku pa hopi siglo kaba ta karakterisá Boneiru, den harmonia ku naturalesa riba tera i den laman, i e desaroyonan enorme i hopi biaha deskontrolá ku den korto tempu nos a keda konfrontá kuné.
Finalmente sra Coffie a konkluí: ‘No por yega na un solushon pa tur e asuntunan akí sin komprenshon i empatia òf sin pasenshi ku e forma den kua ta krea solushon. Sea ku ta na Kralendijk òf na Den Haag. Señora Van Huffelen, mi ta deseá señora sabiduria. Pero spesialmente tambe hopi plaser i pashon pa e kartera mas bunita den gabinete. I e parti di digitalisashon ku tambe señora ta enkargá kuné, pa esei tambe mi tin algun idea pa akí na Boneiru.’
