Dia 21 di ougùstùs último konsehal Daisy Coffie a manda un karta rekordatorio pa Kolegio Ehekutivo di Entidat Públiko Boneiru, kaminda sra. Coffie ta kuestioná e echo ku e no a risibí ningun kontesta riba e kartanan ku pregunta ku el a manda a base di artíkulo 45 di Reglamentu di Òrdu di Konseho Insular. Insiso 3 di e artíkulo akí ta bisa lo siguiente: Kontestashon por eskrito mester tuma lugá mas pronto posibel, en todo kaso dentro di 30 dia despues ku e preguntanan a drenta. Kontestashon oral ta tuma lugá den e próksimo reunion di Konseho Insular. Den kaso ku kontestashon no por tuma lugá dentro di e términonan akí, e miembro responsabel pa esaki den Kolegio Ehekutivo òf gezaghèber ta pone e konsehal ku a hasi pregunta na altura di esaki, inkluso e motibunan pa esaki, kaminda ta indiká tambe e término dentro di kua sí e kontestashon lo tuma lugá. Den kaso di konsehal Daisy Coffie ta trata di un total di 11 karta ku ta kubri un periodo di no ménos ku 8 luna, esta di desèmber 2020 te ku yüli 2021. Den su karta rekordatorio korektamente sra. Coffie ta trese dilanti ku asumiendo e posishon aki Kolegio Ehekutivo ta opstakulisá su persona komo miembro di Konseho Insular i representante di pueblo ku tin komo un di su tareanan: kontrolá ehekushon di maneho di Kolegio Ehekutivo. Ademas e posishon aki ta un violashon di entre otro e prinsipio di transparensia komo un di e prinsipionan di bon gobernashon ku ta di vital importansia pa kredibilidat di gobernashon.
E kartanan konserní
Den luna di desèmber 2020 konsehal Daisy Coffie a manda dos karta pa Kolegio Ehekutivo. Unu ku pregunta tokante BOPEC/PDVSA i e otro tokante edifisionan di gobièrnu di Boneiru relashoná ku e tereno 4D-3283. Pa loke ta trata e tereno 4D-3283 a risibí algun dokumentashon i kontestanan por eskrito, pero kontestanan oral segun e petishon konforme artíkulo 45 di Reglamentu di Òrdu no a tuma lugá ainda. Na luna di yanüari 2021 a bai un karta ku pregunta tokante e asina yamá ‘BOB bus’. Dia 7 di febrüari 2021 sra. Coffie a hasi pregunta por eskrito tokante e situashon na skolnan di Boneiru. Un siman despues, esta dia 14 di febrüari 2021 a bai un karta ku pregunta tokante lèntfel ilegal. Den luna di aprel 2021 konsehal Daisy Coffie a hasi pregunta por eskrito tokante státus di e rekomendashonnan di CRM-link pa Bonaire Holding Maatschappij. Den luna di mei 2021 sra. Coffie a manda 4 karta ku pregunta tokante akomodashon di direktoradonan di Entidat Públiko Boneiru, e proyektonan di Waf di Chachacha i Waf di Piskadó, e proyekto relashoná ku e kaminda ku ta kore di BOPEC pa Playa Frans i subida di preis di gasolin i subida di preis di hür di kas di Fundashon Cas Boneriano. Por último dia 22 di yüli 2021 Daisy Coffie a hasi pregunta por eskrito tokante e rotònde na e krusada di Kaya Amsterdam i Kaminda Djabou. Riba ningun di e kartanan akí konsehal Daisy Coffie no a risibí ni un solo kontesta.
Segun konsehal Daisy Coffie e manera di aktua akí di Kolegio Ehekutivo ta un violashon tambe di artíkulo 49 di e Reglamentu di Òrdu di Konseho Insular ku ta bisa den insiso 1 ku Kolegio Ehekutivo i kada un di su miembronan separadamente mester responsabilisá nan mes pa e maneho ku nan ta hiba. Insiso 2 i 3 ta bisa ku nan tin ku duna Konseho Insular tur informashon, sea ta por eskrito òf oralmente, ku Konseho Insular mester pa ehekutá su tarea. Daisy Coffie: ‘Kon mi por hasi mi trabou manera mester ta si ta pasa asina un periodo largu sin ku mi haña kontesta riba mi preguntanan? Mi ke enfatisá ku mi no ta kontra ningun proyekto, pero komo miembro di Konseho Insular i representante di pueblo mi tin derecho sí di sa kiko ta tumando lugá i kon kosnan ta kana. Ademas, mustrando transparensia i dunando kontesta na tempu Kolegio Ehekutivo ta evitá tambe ku ta surgi tur tipo di spekulashon den pueblo.’
