IAMTORO, e marka di paña djabou di e aktor hulandes Everon Jackson Hooi, ta buskando modelo pa un fotoshoot ku na honor di su di sinku aniversario lo tuma lugá na Boneiru. Pa e motibu akí dia 2 di sèptèmber e marka ta organisá un casting habrí espektakular yen di ‘island vibes’ riba kaya den sentro di Amsterdam. Durante e simannan binidero un di dos rònt di casting ta tuma lugá online pa modelonan ku ta biba na Boneiru.
Everon i su kandidato-modelonan dia 2 di sèptèmber ta duna Amsterdam un toke karibense. Pa e kampaña nobo di IAMTORO ta transformá e parada di tram riba Leidseplein den un studio di casting. E partisipantenan na e casting habrí úniko akí tin chèns pa keda selektá pa un fotoshoot ku ta tuma lugá na fin di luna di sèptèmber na Boneiru. Pa adelantá sinti sabor di nos isla, ta invitá e kandidatonan pa mustra nan abilidat riba tereno di modelahe den un parada di tram ku lo keda transformá den un playa tropikal, ku Pink Beach di Boneiru komo bèkgrount. Na mes momentu ta mustra e imágennan di e casting riba kaya riba e ret digital di JCDecaux i di e manera akí nan ta alkansá un parti grandi di Hulanda. Everon: ‘Nunka anterior niun hende no a hasi esaki. Via e livestream por sigui nos casting den vários siudat pareu, manera na Amsterdam, Rotterdam i Den Haag. Lo por atmirá e partisipantenan for di ‘Pink Beach’ den nan bòksershòrt, kon great esaki ta?’
Body positivity
‘IAMTORO’ ta un marka pa tur hende hòmber’, asina Everon ta bisa ku entusiasmo. ‘Pa loke ta trata e marka akí tur kos tin di haber ku konfiansa propio i forsa interno. En breve: bo ‘mindset’, no bo kurpa. Pa e motibu akí nos ta organisá un casting ku tur hende por partisipá na dje. Sea ku bo tin un ‘sixpack’ òf un barika chikitu. Tin hopi atenshon pa ‘body positivity’ serka hende muhé, esaki ta algu hopi bon. Pero hende hòmber tambe tin den tur tipo i tamaño. Sigur no tur hende ta kompletamente entrená i te asina leu ku esaki ta konserní nos, esaki lo no ta nesesario tampoko. Basta ku bo ta sinti bo kómodo manera bo ta. I den bòksershòrt naturalmente.’
Yamada pa casting
Banda di e casting habrí na Amsterdam, nos ta invitá hende hòmbernan na Boneiru tambe ku tin interes den trabou di modelo pa mèldu nan mes pa e oportunidat úniko akí pa medio di partisipá na un casting online ku ta bai tuma lugá durante e simannan binidero. Si bo ke tin chèns pa bira un di e karanan di e kampaña nobo di IAMTORO, e ora ei manda un email ku bo informashonnan di kontakto promé ku 2 di sèptèmber na info@iamtoro.shop inkluyendo un selekshon di potrèt riba kua klaramente por mira henter bo kurpa, i preferibelmente tambe un òf dos potrèt den paña djabou òf paña di landa.
Fotoshoot Boneiru
Di tur kandidato ku ta partisipá na e yamadanan pa casting, tantu na Hulanda komo na Boneiru, ta selektá kuater partisipante pa e ‘shoot’ di e kolekshon nobo ku lo tuma lugá na Boneiru. Aunke Everon su raisnan ta na Kòrsou, e tin un kurason kalor pa Boneiru tambe. ‘Finalmente nos tur ta forma parti di un solo Reino ku ta konektá nos ku otro. Pa medio di traha ku modelo for di Hulanda i Boneiru, nos ta traha un brùg entre e dos paisnan akí’, asina Everon ta splika. ‘Ku e kampaña akí nos ke trese un mensahe positivo ku no tin di haber solamente ku konfiansa propio, pero ku konekshon tambe.’
Tokante Everon Jackson Hooi
Everon Jackson Hooi ta un aktor hulandes ku a nase na Kòrsou, i ku prinsipalmente ta konosí pa su ròl komo Bing Mauricius den e novela di televishon di Hulanda ku a dura mas tantu tempu, esta ‘Goede Tijden, Slechte Tijden’. Resientemente por a mir’é tambe den ‘Wie is de mol’ i ‘The Masked Singer’, i el a hunga un ròl prinsipal den Buladó, e pelíkula ku na aña 2020 a keda koroná ku un Bisé di Oro, un Gouden Kalf, pa e mihó pelíkula. Everon ta ko-fundadó i ko-doño di IAMTORO.
Tokante IAMTORO
IAMTORO ta un marka di estilo di bida pa hende hòmber ku un enfoke riba paña djabou. Everon Jackson Hooi, Marc van Eck i Roland Ykel a funda e marka akí na aña 2018. Nòmber di e marka ta un ‘statement’ ku tin di haber ku konfiansa propio, pasobra ora bo ta sigur di bo mes, bo ta logra mas i bo ta saka mas for di bo bida. IAMTORO su aspirashon ta pa inspirá i desafiá hende hòmber i pone nan den nan forsa, i e ta produsí paña ku rèspèt pa hende i medio ambiente. E kolekshon di paña di landa di IAMTORO ta trahá ku plèstik resiklá. Mas informashon riba https://iamtoro.shop
1 comment
[…] Source link […]