E plataforma Suministro di Informashon Personal Antia Hulandes i Aruba (PIVA) durante e último reunion di e aña akí, a para ketu na su 25 añanan di eksistensia i a anunsiá un fase nobo. For di 1 di yanüari 2024 e plataforma ta bai hasi un komienso nobo bou di e nòmber nobo Plataforma di Reino pa Registronan Sivil Karibense / Koninkrijksplatform voor Caribische Burgerzaken (KCB).
25 aña evolushon di Plataforma PIVA: awor KCB pa mehorá registronan sivil
A funda plataforma PIVA na 1999 pa garantisá kalidat di registro di poblashon pa medio di kooperashon entre islanan i Hulanda. Durante e último 25 añanan, el a konvertí den un plataforma ku ta dirigí su mes riba diferente aspekto di registro sivil. Enfasis lo ta riba mehorashon di kalidat pa medio di kooperashon.
“Na momentu ku mi a asumí mi funshon komo Unit Manager na Sint-Eustatius, mi a ripará ku hopi hende no ta nota presensia di registro sivil. Nos tin falta di un presensia kla i hopi hende no ta komprondé relevansia di nos trabou. Mi ke kambia esaki informando públiko i ofresiendo sosten na nos partnernan, tantu paden komo pafó di OLE (Openbaar Lichaam Sint Eustatius). Hasiendo e esfuersonan akí, nos por mehorá efisiensia di nos trabou.” – Nadine Busby, Registro Sivil Sint Eustatius
Afiliashon ku NVVB ta brinda oportunidat nobo
Na 2024 e departamentonan di registronan sivil di e seis islanan karibense ta bira miembo kompleto di Asosiashon Hulandes pa Registronan Sivil (NVVB). NVVB ta asumí e lòbi atministrativo di e plataforma. For di 1994 NVVB ta representá ku éksito interes di su miembronan riba tereno di maneho di informashon personal, maneho di identidat, elekshon i dunamentu di servisio & inovashon. NVVB ta enbolbí miembronan aktivamente den su trabounan komo defensor, konektor, inovador i kuidadó. Esaki ta bai konta despues tambe pa e parti karibense di Reino, asina representando e interesnan akí tambe i kontribuí aktivamente na kalidat di registronan sivil. Ademas esaki ta kondusí na un ret fortifiká pa henter Reino.
Kolaborashon i interkambio di konosimentu
E último reunion di e plataforma na Boneiru a trese e gruponan di interes mas importante huntu: hefenan i empleadonan di registronan sivil di tur departamentu karibense den Reino i representantenan di gabinetenan di gobernadónan di Kòrsou, Aruba i Sint-Maarten. Tambe representantenan di e organisashon di implementashon Departamento di Reino pa Datonan di Identidat (RvIG) i empleadonan enkargá ku maneho di e direktorado Gobièrnu Digital (DO) di ministerio di Asuntunan Interior i Relashon den Reino a partisipá na e reunion di e plataforma. Otro partisipantenan tabata Centric, suministradó di aplikashon di registro sivil, NVVB, Servisio di Imigrashon i Naturalisashon CN (IND), Mareshosé Real (KMar) i Departamento di Impuesto CN.
Sentral den e reunion tabata optimalisashon di kalidat kompartiendo konosimentu i abilidat. E parti karibense di Reino ta konfrontá mesun retonan ku Hulanda Europeo riba e tereno di registro sivil, manera falta di personal. Esei ta pidi atenshon i mehorashon di efisiensia, por ehèmpel den forma di sigui digitalisá prosesonan na e departamentunan di registro sivil.
Registro Sivil ta enkorporá tur informashon tokante habitante. Si tur instansia tuma registro sivil komo punto di salida, nos ta krea un sistema uniforme. Registro Sivil por konribuí na un mihó ‘Quality of life’ pa siudadano. – Geward Bikker, Censo Aruba
Diskurso inspirativo di Gezaghèber Oleana
Gezaghèber interino di Boneiru, Nolly Oleana, a tene un diskurso inspirativo durante e seremonia di apertura. El a enfatisá importansia di departamentunan di registro sivil ku ta funshoná bon relashoná ku retonan i kresementu di islanan. El a hasi un yamada pa kooperashon i pa enkontrá puntonan komun pa fortifiká otro.
“Laga nos, komo kompatriotanan den Reino, huntu dirigí nos riba similaridatnan ku nos ta kompartí, na lugá di gasta energia na buska diferensia.Finalmente nos tin ku bai para den nos forsa.” – Nolly Oleana.
Registro sivil, un ekspertisio riba su mes
E departamentunan di registro sivil ta di importansia krusial i ademas di un sentido haltu di integridat, ta rekerí konosementu i ekspertisio spesífiko pa evitá eror ku por tin konsekuensia grandi. Datonan den registronan di poblashon ta di importansia grandi pa e organisashonnan di gobièrnu ku ta hasi uso di e informashonnan akí pa ehekushon di nan tareanan. Empleadonan mester ta bon prepará i por traha efisientemente. Un sistema ku ta funshoná efisientemente ta benefisiá siudadano, ku ménos tempu di espera i mas posibildidat pa regla kos digitalmente. Promé ku departamentonan ta asina leu pa por digitalisá totalmente, mester hasi hopi preparashon. Den Reino tin isla ku ta mas leu ku otro. Por superá e diferensianan kompartiendo konosementu i traha huntu.
Mas sinergia na 2024 i despues
For di yanüari 2024, Plataforma di Reino pa Registronan Sivil Karibense / Het Koninkrijksplatform voor Caribische Burgerzaken (KCB) lo fungi komo un plataforma esensial kaminda miembronan ta bini huntu pa diskutí kasonan di práktika i trèntnan den e region karibense i kompartí konosimentu. KCB lo sirbi komo un sentro dinámiko di diálogo, pa eksplorá temanan nobo i fasilitá entrenamentu pa kompartí konosementu dentro di e área di registro sivil. Nos ta invitá partnernan di kadena kordialmente pa afiliá, loke lo kontribuí na liñanan di komunikashon mas kòrtiku i kreashon di mas sinergia.
Pa mas informashon i kontakto, secretaris@pivaplatform.org.
