Konhuntamente responsabel pa un Boneiru mas sigur

Despues di a sirbi pa mas ku 100 dia komo gezaghèber di Boneiru, gezaghèber Oleana a ripará un tendensia preokupante, kaminda solidaridat i rèspèt ta bayendo atras na nos isla. Den su ròl komo tata di pueblo i presidente di e triángulo di siguridat, e ta sinti su mes obligá pa hala atenshon di nos suidadanonan tokante nan komportashon. Esaki pasobra por sierto ta trata di un responsabilidat konhunto pa sòru pa naturalesa, kultura i siguridat di nos dushi isla.

Durante un konferensia di prensa ku resientemente a tuma lugá, a papia tokante diferente kestion preokupante, entre otro molèster di sonido ku ta oumentando, shushi tirá riba kaya, i uso di droga i alkohòl. Banda di esaki siguridat den tráfiko tabata haltu riba agènda. Pa kuerpo polisial esaki ta un di e prioridatnan di mas importante, mirando e kantidat alarmante di aksidente di tráfiko ku den mayoria kaso ta keda okashoná pa motibu di korementu di outo bou di influensia.

‘Si bo dal, bo tin ku supla’, asina Alwyn Braaf, hefe di Kuerpo Polisial Hulanda Karibense a deklará. Banda di kontròl den forma arbitrario i den forma planiá den tráfiko, awor akí ta standart pa hasi kontròl despues di un dalmentu. Okashoná un aksidente fatal bou di influensia di alkohòl òf otro tipo di droga, ta keda kastigá ku un kastigu di prison. Nan a pone énfasis riba importansia di mantenshon di lei, pero a bisa tambe ku esaki no ta e úniko solushon. Ta esensial pa tur habitante di Boneiru ta konsiente di nan ròl den kreashon di un komunidat seif i respetuoso. 

Pa e motibu akí gezaghèber Oleana ta hasi un yamada riba henter nos poblashon pa uni forsa i partisipá aktivamente den mehorashon di e sirkunstansianan di bida na Boneiru. Esaki por pa medio di redusí molèster di sonido, rùim òp shushi riba kaya i deskurashá uso di droga i alkohòl. Aparte di esaki ta supliká tur hende urgentemente pa tuma  responsabilidat, tantu pa nan propio komportashon, komo pa hala atenshon di amigunan, miembronan di famia òf sernan kerí. 

Gezaghèber Oleana ta enfatisá ku oumento di solidaridat i rèspèt ta esensial pa desaroyo i bienestar di Boneiru. Huntu nos por sòru pa nos isla keda un komunidat seif i floresiente, kaminda tantu nos habitantenan komo nos bishitantenan por disfrutá di tur kos bunita ku Boneiru tin di ofresé.

Por wak henter e konferensia di prensa riba kanal di YouTube di entidat públiko Boneiru. E lenk pa e grabashon ta: